ఈమాట రచయితలకూ, పాఠకులకూ నూతన సంవత్సర శుభాకాంక్షలతో ఈమాట జనవరి 2009 సంచికకు స్వాగతం.

ప్రముఖ కవి, రచయత శ్రీ స్మైల్ డిసెంబర్ 5వ తేదీ మరణించారు. వారి జ్ఞాపకార్థం ఈ సంచికను స్మైల్ సంచికగా విడుదల చేస్తున్నాం. ఈ సంచికలో విశేషాలు:

• తమ మిత్రుడైన స్మైల్ గురించి వేలూరి వేంకటేశ్వర రావు, వెల్చేరు నారాయణ రావుల వ్యాసాలు, ‘మో’ జ్ఞాపిక.
• ‘చేరాతల’ నుంచి “తెలుగు కవిత్వంలో ‘ఒఖడే’ స్మైల్” వ్యాసం పునఃప్రచురణ
• పునఃప్రచురిస్తున్న స్మైల్ రచనలు: ‘ఖాళీ సీసాలు‘ కథ, ‘ఒఖడే‘ కవిత, ‘పాఠం‘ ఒక చెకొస్లొవేకియన్ కవితకు అనువాదం. వీటిని మాకు తిరిగి ప్రచురించడానికి ప్రత్యేక అనుమతినిచ్చిన శ్రీమతి యాస్మిన్ ఇస్మాయిల్ గారికి కృతజ్ఞతలు. అలాగే, ‘మో’ రచన మాకందించిన విశ్వేశ్వర్రావు, సహాయపడిన పరుచూరి శ్రీనివాస్ గార్లకి మా కృతజ్ఞతలు.
• శబ్దతరంగాలు శీర్షికలో పరుచూరి శ్రీనివాస్ సేకరించిన మరొక అరుదైన రేడియో రూపకం: “కొండ నుంచి కడలి దాకా“
• ఈమాట సాహితీ గ్రంథాలయంలో కొత్త పుస్తకం: పాలపర్తి ఇంద్రాణి కవితల సంకలనం ‘వానకు తడిసిన పువ్వొకటి’.
• ఉదయకళ, మాలతి నిడదవోలు గార్ల కథలు
• బొల్లోజు బాబా, వెంపటి హేమ, కమలప్రసాద్ బొల్లోజు, శ్రీనివాస్ కంచిభొట్ల గార్ల కవితలు
• కంప్యూటింగ్ పూర్వాపరాలు, సాధ్యాసాధ్యాలు , మనకు తెలియని మన త్యాగరాజు వ్యాసాల తరువాయి భాగాలు, నాకు నచ్చిన పద్యం శీర్షికలో నన్నయ భారతంలో కర్ణ ప్రవేశం, ఉత్తర హరివంశ కావ్యం, తెలుగు కుమార సంభవ కావ్యకర్త నన్నెచోడుడు, సత్యజిత్ రాయ్ చిత్రత్రయంలో “అపరాజితో” లపై వ్యాసాలు, నటుడు, నాటక రచయిత రావి కొండలరావు ప్రత్యేక పరిచయం.
• ఇంకా, వేలూరి సంపాదకీయం “రచయితలు – ఎడిటర్లు”

ఎప్పటిలాగానే ఈ సంచికపై కూడా మీ నిర్మాణాత్మకమైన అభిప్రాయాలు తెలియచేస్తారని ఆశిస్తాము. ఈ ప్రత్యేక సంచిక నిర్మాణంలో సహాయం చేసిన రచయితలు, సమీక్షకులు మొదలైనవారందరికీ ధన్యవాదాలు తెలియచేస్తున్నాం.

కొన్ని ప్రకటనలు

1. ఈమాటకు తమ రచనలు పంపే రచయితలకు, రచనలు పంపే పద్ధతి, సూచనలూ వివరిస్తూ, ఈమాట ఆశయాల్నీ ప్రచురణ పద్ధతులనీ తేటతెల్లం చేయడం కోసంగా రచయితల పేజీ సవరించబడింది. రచయితలు గమనించగలరు.
2. కొంతమంది రచయితలు, సమీక్షల ధ్వని కరుకుగానూ, నొప్పించేటట్టూ ఉంటోందని అభిప్రాయపడ్డారు. ఇది అందరి అనుభవమూ కాకపోయినా, ఉద్దేశపూర్వకంగా చేసినది కాకపోయినా, క్షంతవ్యం కాదు. ఇకనుంచీ మరింత జాగ్రత్తగా సమీక్షలను పరిశీలించిన తర్వాతే రచయితలకు పంపుతాం.
3. ఈమాట వ్యవస్థాపక సంపాదకుల్లో ముఖ్యులైన కొలిచాల సురేశ్ గత సంచిక విడుదల తర్వాత, దైనందిన సంపాదకీయ బాధ్యతల నుంచి స్వచ్చందంగా పదవీ విరమణ చేశారు. సంపాదక బృందం నుండి తొలగినా, ఈమాటలో భాగంగానే కొనసాగుతూ వారి అభిరుచులైన భాషాశాస్త్రం, తెలుగు సాఫ్ట్‌వేర్ రంగాలలో తమ సమయాన్ని వెచ్చిస్తారు. ఆందులో భాగంగా సురేశ్ ఈమాట పాఠకుల కోసం తెలుగు భాషావ్యుత్పత్తులపై తరచూ వ్యాసాలు రాయబోతున్నారు.
4. ఈమాటలో అభిప్రాయాలు రాసేవారు చాలామటుకు తమ పేర్లతోనే రాస్తారు. కొంతమంది మారుపేర్లతో రాస్తున్నారు, మరీ ఒక ‘పాఠకు’డైతే అయితే కనీసం నాలుగు పేర్లతో. దీనివల్ల ఒరిగే ప్రయోజనమేమిటో మాకు తెలియటం లేదు. అందరూ తమ సొంత ఐడెంటిటీతోనే అభిప్రాయాలు రాస్తే బాగుంటుందని మా అభిలాష. అలాగే పేరు ఏది పెట్టుకున్నా కనీసం ఈమెయిల్ ఐనా నిజమైనదే ఇస్తే సంపాదకులకు ఆ కామెంట్లు రాసేవారిని సంప్రదించటానికి వీలుగా ఉంటుంది – సవరణలకో, సలహాలకో. ఇందువల్ల జరిగే నష్టమేమీ లేదు. సాధారణంగా ఈ దేశంలో పత్రికలన్నీ అభిప్రాయాలు రాసేవారి ఫోన్ నంబరు అడుగుతాయి, ఐడెంటిటీ కన్ఫర్మేషన్ కోసం. ఈమాటకు ప్రస్తుతం అంత అవసరం లేదు, రాకూడదనే మా కోరిక. అయితే, కామెంట్లకు సంబంధించి కొన్ని కొత్త నిబంధనలు ఈ సంచిక నుంచీ ప్రవేశపెడుతున్నాం.
   • అభిప్రాయాలు కేవలం ఏ కథకో కవితకో వ్యాసానికో ప్రత్యక్షంగా సంబంధించి ఉండాలి. ఏ రచనకూ సంబంధం లేని అభిప్రాయాలు ప్రచురించబడవు. తోటి పాఠకుల అభిప్రాయాలను అవహేళన చేసే కామెంట్లు కూడా ప్రచురించబడవు.
   • అభిప్రాయాలు సాధ్యమైనంత వరకూ తెలుగులో లేదా ఇంగ్లీష్ లోనే ఉండాలి. RTS లేదా Unicode పద్ధతి వాడకుండా ఇంగ్లీషులో రాసిన తెలుగు కామెంట్లు ప్రచురించబడవు.
   • ఒకటీ, రెండు పదాల కామెంట్లు (అద్భుతం, బాగుంది, నాకు నచ్చింది, వగైరా) ఇకముందు నుంచీ ప్రచురించబడవు. నచ్చిందని చెప్పేటప్పుడు కనీసం ఏది నచ్చిందో, ఎందుకు నచ్చిందో కూడా చెప్పని కామెంట్లు ఎవరికోసం? వీటివల్ల రచయితకైనా, తోటి పాఠకులకైనా ఏ ప్రయోజనమూ లేదని మా అభిప్రాయం. అందుకే కామెంట్లు రాసేవారు కొంచెం వివరంగా, విశదంగా, విశ్లేషిస్తూ, విమర్శిస్తూ రాయాలని మా కోరిక. పాఠకులు మా అభిమతాన్ని ప్రోత్సాహిస్తారని ఆశిస్తున్నాం.