శరణుల గరిమ

గగన విస్తీర్ణ గరిమ చంద్రుడెరుగును గాని
గాలి తిరుగు గ్రద్ద లెరుగగలవే?
నదుల గంభీర గరిమ నళినమెరుగును గాని
దరిని పెరుగు దర్భ లెరుగగలవే?
పుష్ప పరిమళ గరిమ భ్రమరమెరుగును గాని
చెట్టు చెరచు చెదలు ఎరుగగలవే?
చెప్పవయ్యా, చెన్నమల్లికార్జున!
నీదు శరణుల గరిమ నీవెరుంగుదువు గాని
గేదె పైన వ్రాలు ఈగ లెరుగగలవా?

కాల్వల నీరాడునా కలహంస?

గిరియందు గాక గడ్డిదిబ్బల మీద ఆడునా నెమలి?
కొలనులో గాక చిన్నికాల్వల నీరాడునా కలహంస?
మావిచిగుళ్ళు మెసవక మోమెత్తి పాడునా కోకిల?
పరిమళములు లేని పూలపై వ్రాలునా తుమ్మెద?
నా దేవుడు చెన్నమల్లికార్జునుని గాక నా మనసు
ఇతరుల నెట్లు చేరగలదో? చెప్పరమ్మా?

పరపురుషులు నాకు తుమ్మముళ్ళేనవ్వా!

పరపురుషులు నాకు తుమ్మముళ్ళేనవ్వా!
ముట్టలేను, వారి చుట్టు తిరుగలేను
నమ్మి, మెచ్చి మాట్లాడలేనవ్వ!
చెన్నమల్లికార్జునుడు గాక
కంటకదేహులు నాకు కంటగింపేనవ్వ!

చెరకు తీపి వీడి చేదెక్కునా?

అగరుచెక్కను నరికి అరగతీసిన గాని
నొగలి సువాసనను వదులుకొనునా?
చొక్కబంగారమును ముక్కలుగ కాల్చిన
వడలి వన్నె వీడి నలుపెక్కునా?
చేరి గానుగ త్రిప్పి చక్కెరగ మార్చిన
చెరకు తీపి వీడి చేదెక్కునా?
చెన్నమల్లికార్జునయ్య, నేను మునుపు చేసిన
చెడుగులెంచుటవలన హాని నీకేనయ్య!
నను పొలియించినను నీ పొందు వీడనయ్య!

దేవుడున్నాడా?

పాలు లేక నెయ్యి ఉండునా లోకమందున?
సూర్యకాంతి లేక అగ్ని ప్రబలునా లోకమందున?
సర్వమహిమాన్వితుడు చెన్నమల్లికార్జునుడు
లేక నా ప్రాణముండునా, లోకమందున?

ఆలించుము నా విన్నపము

ఆలించుము నా విన్నపము, లాలించుము నా విన్నపము
పాలించుము నా విన్నపము, చెన్నమల్లికార్జునా!
ఏలనయ్య నా మొరలు వినవేమయ్యా?
నీవుగాక వేరెవరూ లేరు నాకు, లేరు, లేరు, లేరు!
నాకు నీవే గతి, నీవే నాకు మతి, చెన్నమల్లికార్జునయ్య!

భయపడుటే ఏలనయ్యా?

కొండ మీదనే ఇల్లు గట్టి
మృగములకే భయపడుటే ఏలనయ్యా!
సముద్ర తీరమందు ఇల్లు గట్టి
నురగలకే భయపడుటే ఏలనయ్యా!
సంతలోనే ఒక్క ఇల్లు గట్టి
శబ్దముకే భయపడుటే ఏలనయ్యా!
చెప్పవయ్యా, చెన్నమల్లికార్జునా!
లోకములో పుట్టిన పిదప
స్తుతినిందలకే భయపడుటే ఏలనయ్యా?