తరువుండి ఫలమేమి?

తరువుండి ఫలమేమి నీడనీయకనున్న?
ధనముండి ఫలమేమి దయజూపకున్న?
పశువుండి ఫలమేమి పాడినీయకున్న?
చెలువుండి ఫలమేమి గుణములేకున్న?
తబుకుండి ఫలమేమి తిండి లేకున్న?
నేనుండి ఫలమేమి చెన్నమల్లికార్జున
నీవున్న జ్ఞానమే నాకు లేకున్న?

కంటికి సింగారము

కంటికి సింగారము గురు జంగముల జూచుటే
చెవులకు సింగారము సంకీర్తనలు వినుటే
పలుకులకు సింగారము సత్యమును పలుకుటే
సంభాషణకు గారము సద్భక్తుల నుడువులే
చేతులకు సింగారము సత్పాత్రదానమే
జీవికి సింగారము గణయోగజీవనమే
ఇవి లేని జీవికి బ్రతుకేమి బ్రతుకయ్య
చెన్నమల్లికార్జునయ్య?

లింగమున ఉదయించి …

లింగమున ఉదయించి అంగదేహముదాల్చు
జంగముల ఇంగితము ఏమందునయ్యా?
వారి నడతలే ఆగమము నుడువులే వేదములు
సామాన్య మానవులు కారు కానేకారు వారయ్యా!
‘వృక్షాద్భవంతి బీజాని హి తద్‍వృక్షే లీయతే పునః
రుద్రలోకం పరిత్యక్త్వా శివలోకే భవిష్యతి’
బీజమే వృక్షమై పెరిగి పెరిగీ మరల
ఆ వృక్షమై చిన్ని బీజమైనట్టుగా
లింగమందుదయించి లింగమందైక్యమై
పురాతనులుగ వెలుగు జంగముల సంగమును చూడరయ్యా!
అట్టి పురాతనులను బట్టి వారి శరణునే చేపట్టి
పుట్టుకనే గిట్టింతునయ్యా, చెన్నమల్లికార్జునయ్యా!

ఒక్కసారి చూపించుమా?

తనువు శుద్ధమై మనసు శుద్ధమై
భావశుద్ధులైన వారు నీదు శరణులు
వారినొక్కసారి నాకు చూపించుమా?
నడకలన్ని సదాచారమై
నుడువులన్ని శివాగమములై
నిత్యశుద్ధులైన వారు నీదు శరణులు
వారినొక్కసారి నాకు చూపించుమా?
కారుచీకటిని మెట్టి తళతళగా మెరిసి
వెలికి లోనికొక్కటై వెలయు నీదు శరణులను
చూపించవయ్యా చెన్నమల్లికార్జునయ్యా!

నీ శరణుల రాకకై …

అయ్యా, నీ శరణుల రాకకై
గుడి తోరణములనే కట్టెదనయ్యా!
అయ్యా, నీ శరణల రాకకై
భుజమున పల్లకినే మోసెదనయ్యా!
చూడవయ్య చెన్నమల్లికార్జునా!
మాయింటికి నీ శరణుల రావించి
వారి శ్రీపాదములనే
నాదు హృదయమందు అదుముకొందునయ్యా!