జయంతితే సుకృతినః రససిద్ధాః కవీశ్వరాః
నాస్తి తేషామ్ యశః కాయే జరా మరణజమ్ భయమ్!

ఆచార్య భద్రిరాజు కృష్ణమూర్తి
(19 జూన్1928 – 11 ఆగస్ట్ 2012)<

శాస్త్ర , కళా రంగాల్లో ఎనలేని కృషిచేసి ధృవతారలల్లే దారి చూపిన ఏ కొద్దిమందో మాత్రమే పార్థివ శరీరాన్ని ఒదిలి వెళ్ళిపోయినా యశఃకాయులై చిరంజీవులై మనమధ్యే ఉండిపోతారు. అటువంటి మహామహుడు, ద్రావిడ భాషాశాస్త్రవేత్త, ఆచార్య భద్రిరాజు కృష్ణమూర్తి ఇటీవలే అస్తమించారు. భాషాశాస్త్రానికి ఎనలేని సేవ చేసిన ఆచార్య కృష్ణమూర్తి, విశిష్ట ప్రతిభాసంపన్నులు. తమ విశేషమైన కృషితో జాతీయ, అంతర్జాతీయ స్థాయిలో మన్ననలందుకున్నవారు. ఎంతోమంది శిష్యులకు, ప్రశిష్యులకు, ఔత్సాహికులకు తమ జ్ఞ్ఞానాన్ని పంచి ఇచ్చిన వారు లేని లోటు పూడ్చలేనిది.

తమ వెలుగుతో ప్రపంచపు చీకట్లను పారద్రోలే దీపాలు కొడిగట్టటం, సహజమరణం అనివార్యమని తెలిసినా కూడా బాధించే విషయం. గత కొద్దికాలంగా, అతి తక్కువ వ్యవధిలో చనిపోయిన తెలుగు తేజోమూర్తులను గుర్తు చేసుకున్నప్పుడల్లా ఇది ఒక తరం అంతరిస్తున్న సమయమేమో అనే భావన రాకా మానదు. వారు వెళ్ళిపోగా ఏర్పడ్డ శూన్యం భయపెట్టకా మానదు. దీపాన్ని దీపంతో వెలిగించి దీపావళిగా మార్చినట్లు వారి మార్గదర్శకతను ఆదర్శంగా తీసుకొని ముందు తరాలకు అందించడం మన బాధ్యత, మనం ఆ జ్ఞానమూర్తులకు చూపగల గౌరవం. ఈ తరంలోనూ, రాబోయే తరాల్లోనూ వారు వెలిగించిన జ్ఞానదీపాలు కొడిగట్టకుండా కాపాడే సమర్థులు ఉన్నారనీ, ఉంటారనీ ఆశించడం ఒక పగటికల కాదనే మా బలమైన నమ్మకం.

ఈ సంచికలో కథలు, కవితలు, వ్యాసాలతో పాటుగా సంగీతపరిమళం వెదజల్లే డా. శ్రీపాద పినాకపాణి గారు నిండు నూరవ సంవత్సరంలో అడుగుపెట్టిన శుభసందర్భంలో వారి గురించి పరిచయ వ్యాసం, ప్రత్యేకం. భద్రిరాజు కృష్ణమూర్తిగారి 80వ జన్మదినం సందర్భంగా ఈమాట ప్రచురించిన ప్రత్యేక సంచిక ఈ సమయంలో మరొక్కసారి గుర్తు చేయడం సముచితం. విశ్వనాథ వేదాంత చర్చ ఆడియో మరొక విశేషాంశం….

ఈ సంచికలో:

• అతిథి సంపాదకీయం: మనం అనుసరించలేకపోయిన భద్రిరాజు కృష్ణమూర్తి – వెల్చేరు నారాయణ రావు.
• కథలు: తథాస్తు – గౌరి కృపానందన్; కిటికీ – శారద; నువ్వే నేననీ… – స్వాతీ శ్రీపాద; కాల్వీనో కథలనుంచి 5 – మాధవ్ మాచవరం.
• కవితలు: చెట్టుకింద మనుషులు – పాలపర్తి ఇంద్రాణి; వర్ష రచన – తః తః; ఒక సరళ నిర్వచనం – డా. నారాయణ గరిమెళ్ళ.
• వ్యాసాలు: నా కోరిక, నా ప్రార్థన – బల్రాజ్ సాహ్ని, (అను. సాయి బ్రహ్మానందం గొర్తి); జీవిత నవల 2 – ఇర్వింగ్ స్టోన్, (అను. పప్పు నాగరాజు); ఛందస్సులో గణితాంశములు – జెజ్జాల కృష్ణ మోహన రావు; జానపద చిత్రకళాకారుడు జామినీ రాయ్ – ఎస్. వీ. రామారావు; గానవిద్యా వారిధి శ్రీపాద పినాకపాణి – సాయి బ్రహ్మానందం గొర్తి
• శీర్షికలు: విలువలు – కథ నచ్చిన కారణం – వేలూరి వేంకటేశ్వర రావు; నాకు నచ్చిన పద్యం – ఊరుద్యుతి వర్ణన – చీమలమర్రి బృందావన రావు.
• శబ్ద రచనలు: విశ్వనాథతో వేదాంత చర్చ – విన్నకోట రవిశంకర్.