నేను భూతద్దం దొరకలేదంటాను
నీవు దాని అవసరమే లేదంటావ్
నువ్వు విరగ్గొట్టి పడేసిన
నా కలల ముక్కలను వెతుకుతానంటాను
నువ్వు అసలు నాకు కలలే లేవంటావ్
మన మాటల్లో ఎగిరిపోయిన
సీతాకోక చిలుకల్ని
వెతుకుతానంటాను
నువ్వు అసలు మనం మాట్లాడుకోనే లేదంటావ్
ఇంకా నా మనసులో గాలి వీయదనీ
వాన కురవదనీ అంటావ్
తుఫాను గుప్పిట దాగిన సముద్రాన్నీ
ఇంద్రధనువైన ఆకాశాన్నీ
ఒకేలా ప్రేమించగలనని నేనంటే
అసలు నీకు ప్రేమంటేనే తెలియదంటావ్
