అంత తేలికేం కాదు
కన్నీరు జారి చార కట్టడం
రెప్పల వెనుక మెలకువని
తట్టి నిద్ర లేపడం
లబ్‌డబ్‌లతో పెనవేసి చాచిన
చేతిని విదుల్చుకోవడం
శ్వాసల మధ్య నీరవాన్ని
గుర్తించి గౌరవించడం
కెరటాల మధ్య
ఖాళీలని పూరించుకోవడం
అంత కష్టమూ కాదు
నవ్వు ముసుగుని లాగేసి
మన నాటకాలకి తెర దించడం
కాస్తంత శ్రమించి
పేరుకున్న తుప్పు వదల్చడం
అంత కష్టమేం కాదు
ఎదురుగా కూర్చున్న
అగాథాలని దాటడం
ఎగస్తున్న కోపాల నిప్పులని
కాస్తకాస్తగా చప్పరించెయ్యడం
నిజానికి
అస్సలు కష్టం కాదు
గుక్కెడేసి చొప్పున చక్కెరని పంచుతూ
వొక్కొక్కటిగా లెక్కలన్నింటిని
ఈజీక్వల్టూ జీరోగా మార్చడం