ఆ దుర్గంధానికి వూపిరాడక
గాలి వుక్కిరిబిక్కిరై అల్లాడుతుంది
పారిపోవాలని వొకటే ప్రయాస-పొగచూరిన వూపిరి తిత్తుల గుప్పిటనుంచి
గింజుకుని బయటపడి
పొగ గొట్టాలనుంచి కళ్ళు మూసుకు జారి
పచ్చటి పైరు మీద వాలి
నువాక్రాన్ ఘాటు వొళ్ళంతా పట్టుకుని
అరుస్తూ సముద్రమ్మీద పడి
పారబోసిన చమురు మడ్డిలో
చచ్చిన చేపై తేలింది!దాక్కుందామని అదే తాపత్రయం-
ధ్వని కంపనాలకు దడపుట్టి
నిశ్శబ్దంలోకి తప్పుకోవాలని!దొర్లుకొస్తున్న డుర్…డుర్‌ల నుంచి
మీదికి దూకుతున్న బొయ్…బొయ్‌ల నుంచి
ఎగస్తున్న కఠిన కంఠస్వరాల్లోకి మళ్ళి
కీచు గోళ్ళ గగుర్పాటు గీరుకుని
మోయలేని శబ్దాలు మోసుకుని
భరించలేక ఫటిల్లుమని
పేలుతుంది చావు కేకై.(05/02/1997)
రచయిత చంద్ర కన్నెగంటి గురించి: జననం గుంటూరు జిల్లా సౌపాడులో. నివాసం గ్రేప్‌వైన్‌, టెక్సస్‌లో. సాఫ్ట్‌వేర్‌ రంగంలో పనిచేస్తున్నారు. కథలు, కవితలు వివిధ పత్రికల్లో అచ్చయ్యాయి. కథనంలో శిల్పంలో వీరు చూపించే విభిన్నత అపూర్వం. ... పూర్తిగా »