1.
ఆకాశాన్ని తాకే
ఆకు పచ్చని కొండలా
నిలుచున్న నీవు
చల్లని మేఘంలా
స్పృశిస్తాను నేను
తెల్లని పూవులతో
పులకరించే మేను
ఆకుల మీదుగా
రాలిపడే వానచినుకులు
లోయలో మృదువుగా
వినిపించే అలౌకిక ధ్వనులు
2
తెల్లని మేఘంలా లేచి వస్తాను
లోయలో పుష్పించిన నీ కోసం
చిన్ని పక్షులను వెంటబెట్టుకొని
సున్నితంగా వానచినుకులతో
నీ నుదుట ముద్దాడుతాను
3.
మేఘమై లేచిపోనా
నీడనై వెంటరానా
చేపనై తేలిపోనా
పూవునై ఊగిపోనా
ఎదురు చూడని మోహమై
వెదురు పొదల గానమై
చినుకునై రాలిపడనా
అడుగుజాడలు లేని
అడవిలో లీనమై –
మేఘమై లేచిపోనా
నీడనై వెంటరానా
(*ఫిలాంగ్ = ఎలా ఉన్నావు / How are you — స్థానిక ఖాసీ భాషలో )