కొన్ని మోహాల్లోనో దాహాల్లోనో
నీకై నీవే చిక్కుకున్నప్పుడు
తప్పదు
చెదరిన
గడ్డిపరకల గూటినే
మమకారంగా వెతుక్కునే పిట్టలా
ఈ వేదననిలా భరించాల్సిందే
చూపుల అవధికి అందని
తడితపనల ఇంద్రధనువొకటి
నీకై పలకనందుకూ
నీకోసమేననుకున్న అడుగులు
నీకై ఆగనందుకూ
ఎవరూ తిరగని దారిలో నీవిలా
ఎప్పటికీ ఎదురుచూసే
మైలురాయై మిగలాల్సిందే
చలి కాచుకున్న నెగడును
మోహంగా చేసుకుని
గుండెకు హత్తుకున్న
ప్రతీసారీ
నీవిలా దహించుకుపోవల్సిందే
