ఎన్నున్నా
ఆదిమధ్యాంతరాలు లేని ఆకాశంలో
వేలలక్షల నక్షత్ర మండలాల్లో
ఒక పాలపుంత
పాలపుంత వేలకోట్ల నక్షత్రాలలో
ఒక సూర్య నక్షత్రం
నక్షత్ర మండల వేలలక్షల గ్రహాలలో
ఒక భూగ్రహం
ఆ గ్రహంలో
శ్వాసే ప్రాణంగా
అనేక అవయవాల
అనంతకోటి జీవాలు
ఏ జీవదేహాలకు
ఎన్ని శ్వాసలో?
ఎన్నున్నా
ఆటుపోట్ల
దేహాల సముద్రంలో
అసంఖ్యాక శ్వాసల నౌకలు
ఏవి ఎంత ముందుకు పోగలవో
తెలియని నౌకల
గమ్యం
దూరం
ఒక నిగూఢ రహస్యం!
