పేరుని చుట్టుకుని
మోహపు పొరలు
మాయకత్వం దాచలేక
అద్దాల అవస్థ
వికల స్వప్న తీరాన
గాజుకళ్ళ గవ్వలు
మృతనగర వీధుల్లో
మారకపు ఆత్మలు
ఆకలితీర్చే
పాచిపట్టని అక్షరాలెక్కడ?
మురుగు నీడలు చెరిపే
తాజా దివిటీలెక్కడ?
పారిపోవాలనుంటుంది, కానీ
ఏ ఋతువులోకి, ఏ రంగుల్తో…
ఏ కాలంలోకి, ఏ దేహంతో…
తారీఖులు మింగేసిన కాలంలో
గుర్తున్నవి మాత్రం
ఘనీభవించిన కొన్నిసమయాలే.
తీరమంతా ఆరేసిన బతుకులో
జీవించినది మాత్రం
అల చిట్లిన కొద్ది క్షణాల్లోనే…