(అడిగీ అడగ్గానే బొమ్మ గీసి ఇచ్చిన అన్వర్‌కు బోలెడన్ని కృతజ్ఞతలు బోలెడంత ప్రేమతో – సం.)

ఇరవై అయిదేళ్ళ క్రితం, ఇంటర్‌నెట్ వాడకం మొదలయిన తొలినాళ్ళలో, ప్రవాసంలో ఉన్న తెలుగు సాహిత్యాభిమానులు, రచయితల కోసం ఒక చిరువేదికగా రూపుదిద్దుకున్న పత్రిక ఈమాట. మొట్టమొదటి ఈమాట సంచిక విడుదలై పాతికేళ్ళు దాటిన సందర్భంలో, ఈ సుదీర్ఘ ప్రయాణాన్ని సింహావలోకనం చేసుకుంటుంటే, మైలురాళ్ళ లాంటి ఎన్నో సందర్భాలు కనపడుతున్నాయి. వెబ్ పత్రికలంటే ప్రింట్ పత్రికల స్థాయీ కాదు, వాటికి ప్రత్యామ్నాయమూ కాదు అనుకున్న ఆ తొలినాటి నుండి, కథలైనా, కవితలైనా, ఏ వార్షిక సంకలనాలైనా వెబ్‌పత్రికలను జల్లెడ పట్టక తప్పని ఈనాటి దాకా సాగిన సుదీర్ఘ ప్రయాణమిది. లాభాపేక్ష లేకుండా, కుల మత రాజకీయ వాదాలకూ వర్గాలకూ అతీతంగా, రచయితలకూ పాఠకులకూ స్నేహపూరితమైన వాతావరణాన్ని అందించే ఉమ్మడి వేదికగా మనగలగడమే మొదటినుంచీ ఈమాట ఏకైక లక్ష్యం. సాహిత్యానికి నిర్వచనాలు, పరిధులు, పరిమితులు ఉండవు, ఉండకూడదు అన్న బలమైన నమ్మకంతో అన్ని రకాల అభిప్రాయాలకు, నూతన సాంప్రదాయ సాహిత్యాలకు, విభిన్న సాహిత్య ప్రయోగాలకూ నెలవు కావాలన్న ఆదర్శానికి, ఆశయానికీ ఈమాట ఈనాటికీ కట్టుబడి ఉంది. రచయితకు ముఖస్తుతి గౌరవం కాదు. వారి రచన పట్ల శ్రద్ధ చూపడం, సమయం వెచ్చించడం, చర్చించడం, సహృదయంతో విమర్శించడం – ఇదీ రచయితకు చూపగల నిజమైన గౌరవం. రచయితల పేరు కాదు, రచన నాణ్యత ముఖ్యం అన్న అకుంఠిత నియమంతో నడపడం వల్ల, కొందరు రచయితలు ఈమాటకు వ్రాయలేదు, కొందరు మా పరిష్కరణ పద్ధతుల పట్ల సుముఖులు కాలేదు. మరి కొందరు ఆగ్రహించారు, దూషించారు. కానీ ఎందరో ఈమాటకు వ్రాశారు, ఇంకొందరు కేవలం ఈమాటకే వ్రాశారు. ఎందరో రచయితలు మా పరిష్కరణలను సాహిత్యస్ఫూర్తితో ఆహ్వానించారు. అవసరమైన చోట వారి రచనలు మెరుగు పరుచుకోగలందుకు మా సూచనలు స్వీకరించారు. ఈమాట నియమాన్ని సాహిత్యవ్యాసంగపు ముఖ్యావసరంగా గుర్తించి సంపాదకులతో కలిసి పనిచేసి తమ రచనలకు మెరుగులు దిద్దుకున్నారు. ఒకరి తప్పులు ఒకరు ఎత్తి చూపుకోవడం కాదు, కలిసి తప్పులు దిద్దుకోవడం ఇది అని గుర్తించారు. రచయితలు సంపాదకులూ ఒకరికొకరు తోడుగా ఒకే గమ్యం కోసం కలిసి చేసే సాహితీప్రయాణం ఇది అని అర్థం చేసుకున్నారు. అలానే ఎందరో సాహిత్య ప్రేమికులు ఇక్కడి రచనలను మిత్రులతో పంచుకున్నారు. చదివారు, చదివించారు. విమర్శించారు. తప్పులను నిష్కర్షగా చర్చకు పెట్టారు. మేము మెరుగయ్యే మార్గాలు ప్రతిపాదించారు. ఒక సాహిత్యసమాజంగా మనందరి గమ్యం ఒకటే అన్న స్పృహతో సాగిన ఈ ప్రయాణాన్ని, కాలంతో ఎదుగుతూ, సమకాలీనతకు ఒదుగుతూ, ఇలానే కొనసాగించడానికి మా శాయశక్తులా ప్రయత్నిస్తూనే ఉంటాం. మాకు వెన్నుదట్టి, ప్రోత్సహించి ఈ ప్రయాణంలో మాతో కలిసి నడిచిన రచయితలు, పాఠకులకు ఈ సందర్భంగా మనసారా కృతజ్ఞతలు చెప్పుకుంటున్నాం. తొలినాటి నుంచీ తోడు నడిచిన రచయితలతో పాటు ఎందరో కొత్త రచయితలు, ఎంతో ఆసక్తితో ఈమాటకు తమ రచనలు పంపుతున్నారు, మాతో చర్చిస్తున్నారు, ఈమాట నిరంతరాయంగా నడపడానికి మాకు ఎనలేని ప్రోత్సాహం ఇస్తున్నారు. మీ ప్రోత్సాహం ఇకముందూ ఇలానే ఉంటుందని ఆశిస్తూ, మీ అందరికీ మరోసారి కృతజ్ఞతాపూర్వకంగా ఈ సంచికకు సాదర స్వాగతం పలుకుతున్నాం.