నాకెందుకు చూపవు నీ ముఖము?

వనమెల్లయు నీవే, దేవా, వనమందలి తరువెల్లా నీవే
తరులందాడెడు ఖగమృగమెల్లా నీవే
చెన్నమల్లికార్జునా, సర్వభరితుడవైన నీవు
నాకెందుకు చూపవు నీ ముఖము?

చూడలేదా, మీరు చూడలేదా?

చిలిమిలి అని పలుకు చిలుకలారా!
చూడలేదా, మీరు చూడలేదా?
స్వరమెత్తి పాడేటి కోకిలలారా!
చూడలేదా, మీరు చూడలేదా?
రేగి తిరిగేటి తుమ్మెదలారా!
చూడలేదా, మీరు చూడలేదా?
కొలనిని ఆడేటి కలహంసలారా!
చూడలేదా, మీరు చూడలేదా?
గిరిగహ్వరమునాడు నెమలులారా!
చూడలేదా, మీరు చూడలేదా?
చెన్నమల్లికార్జునుడెచట నుండెనో
చెప్పలేరా, మీరు చెప్పలేరా?

పిలిచి చూపించరే?

అళిసంకులమా, ఓ మామిడితరువా!
ఓ తెలివెన్నెల, ఓ కోకిల గణమా!
మీ అందరినీ నే వేడేదొక్కటే
నా ఒడయడు చెన్నమల్లికార్జున దేవుని చూచిన
నను పిలిచి చూపించరే?

రాకూడని భవములందు వచ్చితినమ్మా!

చిచ్చులేని సెగలోన వేగితి నమ్మా!
రేగనట్టి గాయముచే నొగిలితి నమ్మా!
సుఖములేని శ్రమము నే చేకొంటినమ్మా!
చెన్నమల్లికార్జున దేవుణ్ణి వలచి
రాకూడని భవములందు వచ్చితినమ్మా!

మనసులోని మనసు వాడు

తనువనువాయెను, మనసనువాయెను,
ప్రాణము కూడా సిద్ధమాయెను.
కినిసి రాడాయెను కిచ్చుకంటివాడు
నా ప్రాణములో నున్నవాడు, మనసులోని మనసు వాడు
నా దేవుడు చెన్నమల్లికార్జునుని గానక
నేనెట్లు బ్రతుకుదునయ్యా?

నిను కొఱలుచు మైమరిచి యుంటి!

పగలు నాలుగు జాములు నీ కలవరమున నుంటి
రేయి నాల్గు జాములు లింగవికలావస్థ నుంటి
రేబవళ్ళు నిను కొఱలుచు మైమరిచి యుంటి
చెన్నమల్లికార్జునయ్యా, నీ వలపు కొరకు
ఆకలి దప్పులు, నిద్రయు తొఱగితినయ్యా!
(కొఱలు= కోరు; తొఱగు= తృణీకరించు)

చిటచిట నిప్పులు రేగిన …

చిటచిట నిప్పులు రేగిన
నా ఆకలి తీర్చుట కనుకొందును!
ఫెళఫెళ మొయిళ్ళు కురిసిన
నా స్నానము కొరకే ననుకొందును!
తొటతొట రాళ్ళే పడిన
నాపై రాలిన పుష్పములనుకొందును!
చెన్నమల్లికార్జునయ్య!
గిరగిర శిల గిరినుండి జారి
శిరమున బడుచో
నా ప్రాణమే నీకర్పితమనుకొందును!

అక్కా, నేనొక్క కలగంటి!

అక్కా, వినవే, నేనొక్క కలగంటి
ఆకు వక్కలు ప్రాలు టెంకాయలను గంటి
చిటిపొటి జడలతో తెలిపళ్ళ గురువును
భిక్షకై వాకిలిని నిలిచిన దొరను
మిక్కిలి మీరిన మక్కువతో చేపట్టితిని!
చెన్నమల్లికార్జునుని చెలువము జూచి
కన్నులు తెరచితిని! నేను కన్నులు తెరచితిని!

కనుల కఱవు తీరిపోయె నేడు

పొలయు కెంజడలు
మణిమకుట మొప్పెడు పలువరుసయు
నగుమొగముతో కనుల కాంతి గలిసి
ఈరేడు భువనములకే
వెలుగైన దివ్యరూపము గంటిని
కన్న కనుల కఱవు తీరిపోయెను నేడు
గండరగండులను పెండ్లముగ నేలేటి
గఱువనే కంటి నేను!
జగదాదిశక్తితో జతకూడి జగమేలు
పరమగురువైనట్టి
చెన్నమల్లికార్జునుని నెఱవుగని బ్రతికితి నేను!

వలచిన దాననవ్వా!

నా మనసునే మాఱుకొనెనవ్వా!
నా తనువునే చూఱగొనెనవ్వా!
నా సుఖమునే సందుకొనెనవ్వా!
నా మనికినే ప్రాపుగొనెనవ్వా!
చెన్నమల్లికార్జునుని వలచినదాననవ్వా!
(మాఱుకొను=ఎదురుకొను; సందుకొను=స్వీకరించు; ప్రాపుగొను=అండగొను, ఆశ్రయించు)