ఆకురాలు కాలము

సాధించిన విజయమ్ములు,
వేధించెడు యపజయములు, – విరివిగ మదిలో
శోధించెడు సమయముగా
నీ ధర శరదృతువు వచ్చె – నింపుల కిరవై
రంగుల రమణీయతతో
పొంగెడు సుప్రభలు నిండ – మోహనకరమౌ
సంగీతముతో జగమను
రంగస్థలిపైన వచ్చె – రాగాంబరియై
వాతావరణము కడుకడు
శీతలమయె బయట వీచె – శీతానిలముల్
వాతావరణము హృదయపు
లోతులలో వెచ్చబడెను – లోలాయముగా
గతకాలము దలచుచు, స్వా-
గతమీయగ భావి నెంచి – కలలను గనుచున్
మితముగ మారెను ప్రకృతి య-
మితమును వీడినది పొదుపు – మృగముల కబ్బెన్
ఆమనిలో చిగిరిన యా
భూమిజముల వివిధ వర్ణ – భూషణగణముల్
కోమల పత్రములు మిగుల
ప్రేమను కంబళము లెన్నొ – ప్రియముగ వ్రాసెన్
నిదురించును మాసమ్ములు
వదలక వృక్షములు తాము – వసుధాతలిపై
మధుమాసము వచ్చు దనుక
నిదురించును ననలు కూడ – నిర్లిప్తముగా
అంబరమున నంబుదములు
సంబరమున తూలికలన – సాగుచునుండెన్
బింబమ్ములు ధారుణిపై
సంబరమున పరుగుదీసె – సాదృశ్యముతో
పున్నమి పంటల కోతకు
పున్నమి వేటాడు వారి – పోడిమికొఱకై
పున్నమిలో చంద్రుని గుడి
కన్నుల విందగును గాదె – గగనమునందున్
శారదరాత్రులలో బలు
తారకహారములు దోచె – తళతళమంచున్
నీరదములు కనిపించని
నీరంధ్రమునందు బహుళ – నిర్మలకాంతిన్
మండల మొక్కటి హంసగ
మండల మొండేడు ఋషుల – మాడ్కిన్ దోచెన్
కుండవలె దోచె నొక్కటి
మెండుగ వేఱ్వేఱు భంగి – మింటను దారల్
ధ్రువ నక్షత్రము గనపడె
రవణించెను జ్యేష్ఠతార – రాజిలె నభిజిత్
నవముగ బిదికిన క్షీరము
నవిరళమగు ఫేన మనగ – నగపడె చుక్కల్
హిమమయె ముత్యమ్ములుగా
సుమములపై సుందరముగ – సొబగులతోడన్
హిమమయెను గాజు తలుపుల
రమణీయమ్మైన తెరల – లాఘవములతో
గుమ్మడికాయల మలచిరి
యిమ్ముగ రూపమ్ము నొకటి – నిఱుగన్నుల, దీ-
పమ్ముంచిరి యందు వెలుగు
చిమ్మగ గడు భయము గల్గ-జేసిరి చిరుతల్
వేసము బాలురు దాల్చిరి
వేసము బాలికలు దాల్చి – వీథులలో సం-
తోసము నిండ మిటాయిల
కోసము తిరుగాడి చనిరి – గుంపుగ నింపై
శృంగాకారములోగల
రంగుల బుట్టలను నింపి – రా తరుణము పల్
భంగుల ఫలధాన్యములన్
మంగళముగ నిండుదనము – మహి జాటంగన్
ఇంపగు కెంపుల జొంపలొ
సొంపగు బంగారు రేకు – సొగసుల సిరులో
వంపుల మరకతవల్లులొ
నింపెను కంబళమువోలె – నేలను నాకుల్
ఆమనిలో బలు రంగుల
కోమల కుసుమాల తావి – కొసరుచు పవన
మ్మేమనె నళితో యంచున్
బ్రేమన్ స్మరియించె నేమొ – ప్రిదిలెడి యాకుల్

ఏనాడు దక్షిణమ్మున
యా నవ భూరుహము జేర-నగునో యంచున్
బాణాకారములో జనె
నానావిధమగు స్వనముల – నభమున బక్షుల్
చిన్నప్పుడు తల్లి యొసగ
తిన్నప్పటి రోజు లెల్ల – తియగా గనెనో
మిన్నున రవి దాక నెగురు
మున్నటి యా ఘడియ దల్చి – మురిసినవేమో
దూరముగా పత్రరహిత
భూరుహములు కొండలందు – బోసిగ దోచెన్
తోరణముల యంచులతో
జీరలు గనరావు రాలె – జెచ్చెర నాకుల్
పచ్చని వలువ లవెక్కడ
వెచ్చని పొడవైన మంచి – వేసవి దినముల్
ముచ్చట గొలిపెడు రాత్రుల
యచ్చెరువుల జ్ఞాపకమ్ము – లరుదెంచినవో
ఒకవైపున సందిగ్ధత
యొకవైపున భావి తలపు – లొప్పుగ నుండున్
రకరకముల యాలోచన
లకటా శరదృతువునందు – నగు నీ మదిలో
ముగిసినది పంటకోతయు
నగపడు ఫలరాశి యొసగు – యనుభూతి యెదో
సుగమో దుఃఖమొ తెలియని
సగమగు స్థితి యదియు గాదె – శారదవేళన్
జీవితమున నెన్నుకొనిన
ద్రోవయు సరియౌనొ కాదొ – ధ్రువముగ నెఱుగన్
ద్రోవను వేఱొకటి కొనిన
భావియు వేఱొక్క త్రోవ – పట్టేనేమో
ఇట్టుల సందియములు బలు
తట్టును మెదడునకు తరచు – తప్పక నెపుడున్
బుట్టును శరత్తులో జలి
బుట్టును దలపుల నలుగుచు – పోటులతోడన్
అడుగిడె జీవిత మదియును
కడగానని యాకురాలు – కాలమునందున్
వడివడిగా ప్రాత స్మృతులు
కడవల పోతలుగ ముంచె – క్షణకాలములో
అలనాటి వెల్గు వెల్లువ
లలరుల గంధములు హితుల – యానందోక్తుల్
లలితస్వర నాదమ్ములు
మెలమెల త్రవ్వేను స్మృతుల – మెదడున విడకన్
జ్ఞాపకములు దాకెను నను
జ్ఞాపకములు నింపె నన్ను – జలధారవలెన్
జ్ఞాపకములు చుట్టి తిరిగె
జ్ఞాపకములు ముంచి తేల్చె – శారద రాత్రిన్
ఆది యగు నంతముగ, నా
యాదియు జనియించుచుండు – నంతములోనన్
బూదియగు జీవిత మది, యా
బూదియె కారణము క్రొత్త – పుట్టుకకొఱకున్
చప్పుడు లేకను వచ్చును
జప్పున హేమంతఋతువు – చలితో వలితో
నిప్పుడమిని నిక్కముగా
దప్పక నెవరాపలేరు – దాని బ్రకృతిలో
ఒక నాడీ హేమంతపు
వికటమ్మగు నగవు లెల్ల – వినబడకుండున్
చకచక మొలచును కళికలు
రకరకముల రంగు లలర – రమ్యత చిమ్మన్
వచ్చును వసంతకాలము
హెచ్చగు సుమరాశితోడ – నెల్లెడ నిలపై
మెచ్చుగ భ్రమరాల రొదల
విచ్చును హృత్సరసిజంపు – వేయి దళమ్ముల్
పులుగులు పాడుచునుండును
పలుపలు రీతుల నెలుగుల – వనవీథులలో
కులుకును సుగంధమయముగ
వెలుగును ధారుణి వసంత – విస్మయములతో
జీవనమది యొక పునరు-
జ్జీవనమా లేక క్రొత్త – జీవనమా యా
దేవు డొసంగు నొక పున-
ర్జీవనమా తెలియనౌనె – సృష్టి నెవరికిన్