బాగుంటుంది కదా
పాత ముచ్చటను తీరుబడిగా తిరిగేసుకోవడం.

*
గుర్తుందా,
చలికాలపు సూర్యుడు సర్దుకునే సమయం?
పొగలు కక్కే కప్పుల్లోకి
చెరోపక్క నుండి మునకేయడం!

మనదైన మక్మల్ రహస్యంలా
సగం నానిన మస్కాబిస్కెట్
గొంతు కిందికి మెత్తగా జారిపోవడం.

*

అదే ఆఖరు కదూ!
అలాంటి మరొక సమయం కోసం
ఒకరికొకరం మాటిచ్చుకున్నాం

ఆ సంధ్య మళ్ళీ రాలేదు

ఆశ మాత్రం
కప్పులో కరగని చెక్కరలా,
యిప్పటికీ…