వానా నువ్వెంత జాణవే
జలజల రాగాల జలవీణవే!

భూమిగుండెలో కరిగి
మండుటెండలో మరిగి
తిరిగి నింగికెగసి మెరిసే
మబ్బుదండల రాలుపూతవే       |వానా|

మెరుపుచీర చుట్టుకుని
ఉరుముగజ్జె కట్టుకుని
మొయిలుగట్లు దాటుకుని
నీటిపూలు చల్లేవటే
పచ్చిక పసరువై మట్టికి ఉసురిచ్చేవటే
పంటచేను ఒంటికి చినుకు లాల పోసేవటే        |వానా|

గగనపు నీళ్ళ జల్లెడ వెంట
వెండి నీరెండ నిండ
విల్లై విరిసిన ఏడురంగుల పంట
నీ మాయ కాదటే        |వానా|

మా ఇంటిచూరు నీటితీగవే
ఏటిపాయ మీద తేట నురగవే
కొండవాగు కొత్తనడకవే
బండరాళ్ళకూ ఎండుటాకుకూ
గడ్డిపూలకూ లేతచిగురుకూ
ముద్దులిచ్చి పొయేవటే        |వానా|

ఆకుచెంపపై మెరిసి
సోకు వనమంతా తడిపి
వయసంతా వరదై వాగల్లే ఉరికేవటే
నింగినుంచి నేలకు దూరాలు కొలిచేవటే        |వానా|