ఈమాట” పాఠకలోకానికి నూతన సంవత్సర శుభాకాంక్షలు!
క్రితం సంచికలో వివరించినట్లు “ఈమాట”కు శ్రవ్యవిభాగాన్ని కూడ కలుపుతున్నాం. ఎవరూ వారి రచనల్ని శ్రవ్యరూపంలో పంపలేదు కాని ముందుముందు ముందుకు వస్తారని ఆశిస్తున్నాం, రావలసిందిగా ఆహ్వానిస్తున్నాం. ఐతే ఆంధ్రులకు అతి ప్రియతమమైన సినీసంగీతం కొంత ఈ సంచికలో అందిస్తున్నాం. ఇప్పటి పాటలు దొరికే స్థలాలు ఇంటర్నెట్‌ మీద చాలానే ఉన్నాయి కనుక మేము చాలా పాత పాటలతో ప్రారంభిస్తున్నాం. చిత్తూరు నాగయ్య , శాంతకుమారి , బాలసరస్వతీదేవి లాటి వారి గాత్రమాధుర్యాన్ని, అప్పటి సంగీతధోరణుల్ని ఆనందించగలిగే వారికి, కనీసం అవెలా వుంటాయో అన్న కుతూహలం వున్నవారికి ఇవి ఆమోదయోగ్యాలవుతాయని భావిస్తున్నాం. ఈసంచికలోనే శ్రీశ్రీతో ఆకాశవాణి చేసిన బాతాఖానీని వినిపిస్తున్నాం . రాబోయే సంచికల్లో అరవైలు, డెబ్భైలు, ఎనభైల మొదల్లో వచ్చిన పాటలు, కొన్ని శ్రవ్య కావ్యాలు, మీ ముందుంచటానికి సిద్ధం చేస్తున్నాం.
ఇక రచనల విషయంలో ఈ సంచికలోనూ “ఈమాట” నుంచి మీరు ఆశించే స్థాయి కథలు, కవితలు, వ్యాసాలు అందిస్తున్నాం. కనకప్రసాద్‌ కవిత “శ్రోతలు కోరని పాట” తెలుగు కవిత్వంలో ఒక కొత్త మార్గం. ఆస్వాదించి ఆనందిస్తారని ఆశిస్తాం. భాస్కర్‌ నాటిక “బిగ్‌ బక్స్‌ ” వినోదాత్మకమే కాకుండా ఇక్కడ ప్రదర్శించటానికి సరైన నాటికలు దొరకని లోటును కొంతవరకు తీరుస్తుందని భావిస్తున్నాం.