1
మెలకువలో మత్తు
మెలికతోవ తప్పి
నిలుస్తాను నీడలా
ఖయ్యాం!నాపని ఖాళీ

2
మంచురెల్లు పూలు
కంచుచేతుల తడిమినా
ఇంచుక లేదు తడి
ఖయ్యాం!నాపని ఖాళీ

3
ముందుకు పోనివ్వదు
సందు మొగదల కుక్క
పొందలేక పోయినాను
ఖయ్యాం!నాపని ఖాళీ

4
నిమిషమైనా ఆగని
ఈ మగ్గాల ధ్వని
మామూలునూలు,కానీ
ఖయ్యాం!నాపని ఖాళీ

5
కలగానే బ్రతికాను
కలలో మునిగితేలి
తెలవారుతోంది;చలి
ఖయ్యాం!నాపని ఖాళీ

6
పాదమంతాచితికి
దూదినిచ్చిన వారిని
ఆదమరచినాను
ఖయ్యాం!నాపని ఖాళీ

7
సోదాలన్ని మాని..
నాదొక్కటే మతమని
అదేవిధిగా నమ్మినాను
ఖయ్యాం!నాపని ఖాళీ

8
వానరాకగానక
స్నానమాడినాను
ఈనిలువనీటితోటి
ఖయ్యాం!నాపని ఖాళీ

9
ఈసడించినాను
పిసరంత తప్పు గని
మసిబారిన ముఖాన్ని
ఖయ్యాం!నాపని ఖాళీ

10
ఉలికిపడిలేచినాను
తొలగిన వస్త్రాలు
కళవళ పడినాను
ఖయ్యాం!నాపని ఖాళీ

11
పగటికోసం రాత్రి
సగంనిద్రలో తూలి
వేగిపోయినాను;వెలి
ఖయ్యాం!నాపని ఖాళీ

ఖైర్‌కు

రుబాయీలురాజామోదం,పరుల మెప్పు కోసం కాక ఆత్మచింతనలో భాగంగా రాసినవి. ఇవి బుద్ధిప్రధానాలు కావు, వీటిలో ఇంద్రియపారవశ్యత స్పష్టంగా,మూర్తంగా గోచరిస్తుంది. బలమైన శతక సంప్రదాయం ఉన్న మనకు కవిత్వంలోని ఈ పాయ కొత్త కాదు.ఐతే,ఇందులో నీతిబోధ అసలు కనిపించదు.చాలా అత్మీయంగా,ప్రియంగా చెబుతారు.ఒక రకమైన చార్వాకం అన్నమాట. ఏ అడ్డంకిని సహించరు,ఉన్నదున్నట్టు ముక్తంగా వ్యక్తం చేయడమే.ఈ ప్రక్రియను మక్కీకి మక్కీ (అలా అయే పక్షంలో అంత్యప్రాసలు,హడావుడి ప్రవేశిస్తాయి )కాకుండా, ఆంధ్ర పారశీకాలకు మధ్యేమార్గం అనగా,ఫార్సీ లోని ఆత్మీయగుణం,తెలుగు లోని నిసర్గ సౌందర్యం అవలంబించినాను.