అలజడే జీవితమై
సాహచర్యమే రణరంగమైనపుడు
ఓ కొత్త మలుపును ఊహించవలసిందే

నిజానికీ అబద్ధానికీ మధ్య
సరిహద్దును గమనించలేనపుడు
నిజంగానే ఓ గట్టి ఆలోచన చేయవలసిందే

తల్లడిల్లే హృదయానికి
ఏ ఆలంబనా లేనపుడు
నిను బ్రతికించే నిర్ణయమూ తీసికోవలసిందే

రెపరెపలాడే బ్రతుకు దీపానికి
మరో చేయి తోడై కాపు కాయలేనపుడు
ఎనిమిదో అడుగూ బయటకు వేయవలసిందే

నీతోనే పెరిగిన బంధం
నీలో ఏ పాశలేశాన్నీ మిగల్చలేనపుడు
నీవింకో బంధమై చిగురు తొడగవలసిందే