నీ తల్లితనము ఒల్లనవ్వ!

మనసు మనసుతో ముడివడినప్పుడు
తలపులు ఘనముగ అలవడినప్పుడు
ఆ అనుభవమునకే అవధులుండునా?
ఓ అవ్వా! వెర్రిదానవే నవ్వా!
నా దేవుడు చెన్నమల్లికార్జునుని వలచి
నెరగా నేనే మారిపోతినవ్వ!
నీ తల్లితనమింక నేనొల్లనవ్వ, వెళ్ళవమ్మా!

చెడకయ్యా చెడకయ్యా!

చెడకయ్యా, చెడకయ్యా మృడుని అడుగులను విడకయ్యా!
దృఢము కాదు వడలిపోవు నీ ఒడలు తిరము కాదు
కడమ రాదు సుడివడు సంసార సుఖము తిరము కాదు
చెన్నమల్లికార్జునుని వ్రాతలన్ని చెడక మునుపె
తడయక ఆ జడముడినే శరణనవయ్యా!

గుణదోషవివేచన

గుణదోషవివేచన కలిగేవరకు
కామపుటొడలు క్రోధపు గురుతు
లోభపుటిరువు మోహపు నెలవు
మదావరణము మత్సర యవనిక
తీరని కోర్కెలు తీరగలేవు
తడయని తలపులు తొలగగలేవు
చెన్నమల్లికార్జునుని ఎరుగగ లేము!

చదివి చదివి వేదములు …

చదివి చదివి వేదములు వాదములే తెచ్చెను
వినగ వినగ శాస్త్రములు సందేహము లిచ్చెను
అరయ అరయ ఆగమములు అరిగి సగములాయెను
పూరించగ పురాణములు పూర్వ దారి పట్టెను
నేనెవ్వరు? తానెవ్వరు? బొమ్మ బట్టబయలు చెన్నమల్లికార్జునా!

తవుడు నూకల దంపుడు

వేదశాస్త్ర ఆగమ పురాణములెల్ల
తవుడు నూకల దంపుడే సుమీ!
దంచుటెందుకు? చెరుగుటెందుకు?
చెదిరే మనసును నిలుపగలిగిన
అంతా బట్టబయలు చెన్నమల్లికార్జునా!

నిరాకార లింగము

ఆకారము లేనిదే నిరాకార లింగము
చేతబట్టి మెడనుగట్టి తిరుగువారిదే అజ్ఞానము
హరిబ్రహ్మలే అరయని లింగము
వేద పురాణములు ఎరుగని లింగము
భక్తికి ఫలము లింగము కాదు
జ్ఞానుల విజ్ఞానము లింగము కాదు
కర్మల ప్రతిఫలము లింగము కాదు
తన్ను తానరసి తాదెలిసినచో
చెన్నమల్లికార్జునుడు తానేనని తెలియును కాదా!