నవ్వుతూ పలకరించి
హత్తుకునే కవిత ఒకటి చెప్తావా
నీకు చెందని సామాజిక స్పృహల
ఆత్మవంచన లేని కవిత
వర్గ ప్రాతినిధ్యపు
పక్షపాతపు చూపులేని కవిత
పుంఖానుపుంఖాలుగా సాగి
రొడ్డకొట్టుడు ప్రయోగాలతో
సూక్తివాక్యాలతో
నీకు మాత్రమే సందేశమవని
కవిత ఒక్కటి చెప్తావా
రోజూ వినే మాటలైనా
బతుకులా కొత్తగా అనిపింపచేసే కవిత,
కవి అనిపించుకోవడం కోసమే
రాసినలాంటిది కాని కవిత, ఒక్కటి చెప్తావా
అదాటున కురిసే వర్షంలా నిలువునా తడిపి
ఉక్కిరిబిక్కిరి చేసి నవ్వుకుబోయే కవిత
మనిషిదనపు గుర్తుగా
పచ్చితనాన్ని తొణికించే కవిత
మాటలను కవిత్వపు కలకండ చేసే కవిత
ఒక్కటంటే ఒక్కటైనా చెప్తావా
