క్లాక్ టవర్కు వేలాడుతోన్న
వేశ్య విషాద స్తన్య సంగీతం మీద
పిచ్చివాడి పాదముద్ర
సజీవదహనంలో బూడిదైన
కంచికచర్ల కోటిగాడి
అంటరాని స్వప్నం మీద
పిచ్చివాడి పాదముద్ర
నెత్తురు కక్కుతోన్న
నాగేటి చాళ్ళ మీద
కాలం కసితో పెట్టిన నిశాని
పిచ్చివాడి పాదముద్ర
పిచ్చెక్కిన చందమామ
మత్తెక్కిన సముద్రానికి
రాసిన తొలి ప్రేమలేఖలో
పిచ్చివాడి పాదముద్ర
ఈ పిచ్చివాడి పాదముద్ర
కన్నీళ్ళ కీకారణ్యంలో
గాయపడ్డ కలతనిద్ర
(జూన్ 25, 2000)