పలకల త్రికోణాల పరాలోకనాలతో
నువ్వు నీలోకీ నేను నాలోకీ కలుస్తూ మనలోకీ
అదే దారి అదోసారి మరోసారి కొట్టుకెళ్తూనే
నడుస్తూ కొన్నిసార్లూ గంతు వేస్తూ కొన్నిసార్లూ
నిన్నూ నన్నూ దాటాలని చూస్తూనే
టపటప మోగుతున్న పెదవులని
రెపరెపలాడుతున్న ఎడదలని
మాటల చివరన విడుదలని
గొంతు లోతుల్లో మార్చుకుంటూ
నటిస్తున్నాం విభ్రమని

తరంగాలు కలిసినా తరంగదైర్ఘ్యాలు కలవని
పైకెంత ఎదగనీ కిందచూపులతోనే ఈదుతూ
గమకాలు వడగడుతూ కాలాన్ని
చెరో వైపుకీ చూస్తూ కాళ్ళలోకి దిగని ముళ్ళు లెక్కిస్తూ
నిష్క్రమణ నియమాలు వల్లిస్తూ
ఇంక చాలింకా ఎందుకని నీ మాటనీ నా పాటనీ
చుట్టలు చుట్టేసి ఎగరేద్దామా
మళ్ళీ మబ్బుల్లో కరుగుదామా
తాళం చెవులిచ్చి పుచ్చుకుంటో…