క్రోధి* యను పేరు గల్గినం గోపపడక
మక్కువను నిత్యసౌఖ్యంబు మాకుఁ గూర్చి
ఆదుకొనవయ్య మమ్ము నవాబ్దవర్య!
త్యక్తమొనరించి నీ అభిధార్థమెల్ల!

చిత్రముగ మున్ను దాల్చిన పత్రవస్త్ర
ములకు మారుగ తెలిమంచు పుట్టములను
గట్టియున్నట్టి తీవియకన్నెలెల్ల
మఱల హరితశాటులఁ గట్టు తరుణ మొదవె.

కడచిన వత్సరమందలి
యిడుమలు నవ్యాబ్ద! నీదునేల్బడియందున్
విడిపోయి మాదుబ్రతుకులఁ
బొడసూపుత భవ్యసౌఖ్యపుష్పోదయముల్!

లేవిట మావిపిందెలును, లేవిట యిక్షురసంపునూటలున్,
లేవిట మోదుగుంబువులు, లేవిట కోకిలగానగోష్ఠులున్,
లేవివియంచుఁ గుంద పనిలేదు, నిసుంగుల ముద్దుమాటలున్,
భావుకమిత్రవాక్యములె, భామలపాటలె లోటుఁ దీర్చెడిన్

విచ్చును సత్వరంబుగనె వింతగురంగులపూలు తోఁటలన్
పచ్చతివాచియో యనఁగఁ బ్రాంగణసీమలఁ బర్వు ఘాసమున్
పచ్చని డ్యాఫొడిల్ కనుల పండువుసేయుచు విచ్చు నెల్లెడన్,
ఇచ్చటి భూమి యింక వహియించునునూత్నమనోజ్ఞరూపమున్

స్వాగతింపుఁడు నూత్నవత్సరాధీశునిన్ శుభహారతులతోడ సుదతులార!
అర్చింపుఁ డర్ఘ్యపాద్యాచమనార్పణంబులతోడ ముదమార పురుషులార!
ప్రణమించుఁడీ భావిభాగ్యైకసంప్రాప్తికై భక్తితో పిల్లకాయలార!
స్తవియింపుఁ డీ క్రోధి యవతారమూనిన సుజనునిం జేరి సర్వజనులార!

కాలకర్మంబులను మీరఁ గాదు తరము
బ్రహ్మకేనియు నా పరాత్పరునికేని
అందుచే నబ్దరూపుఁడై యలరువాని
కాలపురుషుని నర్చించి కనుఁడు సుఖము!