మబ్బుల కిరీటం
తలతురిమిన జాబిల్లి
వెన్నెల చారలు ముంగురులు
చుక్కలు జడకుప్పెలు
కలువకొలనులు కన్నులు
శరదృతువన్నెలు మోమెఱపులు

తను
కవి కలల నాయిక
కారువు కరముల సాలభంజిక

చీకటి చీర
కొండచరియ అంచు
రాలుటాకులు కలంకారీ అద్దకాలు
కదిలే నీడలు ఎగిరేపైట
ఊగే ఊడలు చెరిగే కుచ్చిళ్ళు
లోయల ఒడి నిండుగ వనాలు జీవచరాలు

తను
కనిపెంచే మాతృక
కరుణించే దేవిక

లాలిస్తూ పరిపాలిస్తూ
కిలి కిలకిలలు రాగాన పెడుతూ
మంజాళి మంజరీ మంజీరాలు చుడుతూ
రోచన సహజ విశ్వప్రేమను పెంచుతూ పంచుతూ

నేల వేదిక
ఒద్దికగా కూర్చుంది
హరితరూపసి గిరిపుత్రిక