ఒక సంభాషణేదో
నడుస్తూనే వుంటుంది
అర్థంగాని సైగలు చేస్తూ
కనుల ముందే వున్నట్లనిపిస్తూ

కొంచెంగానే నవ్వి చెప్పిన మాట
కలువల కింద మెదిలి వెళ్ళిన చేపపిల్లలా
చెప్పకనే చూపు మిగిల్చుకున్న నవ్వొకటి
చలిమంటలో అగ్గి ఆరనట్టే

ఎప్పుడూ ఇంతే
ఏవో చెప్పాల్సినవి ఇంకా వున్నప్పుడే
ఎడద పొరల లోపలి నీటి జలలా కవ్విస్తూ
గురుతెరుగని మెలకువలా
తెరిపిరాని స్వప్నంలా
అలజడి చేస్తూ…