ఒక కన్ను ఇంకో కన్నుకై వెదుకుతుంటుంది
అదేమో ఎక్కడో వుండి
పికాసో చిత్రంలోలా
ఇంకొక దేన్నో వెతుకుతూ చూస్తుండిపోతుంది
ఎండమావులకై తిరిగి
గరగరలాడే ఇసుక నింపుకున్న
రెండు కనులూ కలిసి
అర్థం కాని మనసుకు
ఏదో నేర్పాలని ప్రయత్నిస్తుంటై
కలిసీ కలవనట్లు పోయే
రెండు దారుల్లా వెళుతూనే
ఎక్కడికో ఒకచోటికి
ఇష్టంతోనో నిష్టూరంతోనో చేరుతూనే వుంటాం
సాయంత్రం తెచ్చిన చీకటిలో మనలను మనమే వెతుక్కుంటూ
పొంతనలేని కలలతో కలవరపడతాం
మళ్ళీ తెలవారంగానే
తెలిసిందే అయినా సరే
ఏదో ఒక దారి ఎంచుకుంటూ
సమాధానపడుతూ
ఖాళీలను పూరించాలనుకుంటూ
ఒక ఘడియ నుంచి ఇంకో ఘడియలోకి జారుతూ…
