బ్రహ్మానందం, ఆనందో బ్రహ్మా అంటూ ముచ్చటగా మూడో టకీలా షాట్‌ వేసింతర్వాత, ప్రపంచ ఆర్థిక పరిస్థితి గురించి ఫమీదాకి పాఠం చెప్పడం మొదలెట్టాడు, బార్‌లో. ప్రతి శుక్రవారం ఫమీదాకీ బ్రహ్మానందానికీ ఇది మామూలు తతంగవే. ఈ మధ్య కాలంలో స్టాక్‌ మార్కెట్ యోయోలా పైకీ కిందకీ పోవడం, నూటికి తొంభైసార్లు కిందకే పోవడం జరుగుతూవుంటే, బ్రహ్మానందంకి అన్ని ఆర్థిక సిద్ధాంతాల మీద గౌరవం పూర్తిగా సన్నగిల్లిపోయింది. ప్రస్తుత ఆర్థిక పరిస్థితి అంతా ‘బటర్‌ఫ్లై ఎఫెక్ట్‌’ అని సిద్ధాంతీకరించి, ప్రతి శుక్రవారం ఫమీదాకి ఈ కొత్త సిద్ధాంతం నూరిపొయ్యడం ఒక పెద్ద పనిగా తయారయ్యింది.
బ్రహ్మానందం రిజిస్టర్డ్‌ ఇండిపెండెంట్‌ స్టాక్‌ బ్రోకర్‌. డౌన్‌టౌన్‌లో ట్రాన్స్ అమెరికా భవనంలో నలభైరెండో అంతస్తులో రెండు గదుల ఆఫీసు. ఏ. బీ. బ్రోకర్స్‌, యెల్.యెల్. సీ. ప్రెసిడెంట్ ఆనంద్‌ బ్రహ్మా, ఎం. బి. ఏ, అనే పాలరాతి పలక ఆఫీసు గుమ్మం పక్కన గోడమీద అతికించి ఉంటుంది. ఫమీదా బ్రహ్మానందానికి పర్సనల్‌ అసిస్టెంట్. ముందు గదిలో మూడు ఫోనులు, మూడు కంప్యూటర్లూ, ఒక పెద్ద డెస్క్‌. దాని వెనకాల, ఎత్తు కుర్చీలో ఫమీదా. వెనక గదిలో బ్రహ్మానందం డెస్కు, కంప్యూటర్లూ, టెలిఫోన్లూ! గోడమీద పెద్ద సైజు టెలివిజన్‌. స్టాక్‌ బ్రోకర్‌ అని చెప్పుకున్నా నిజంగా బ్రహ్మానందం స్టాకులు కొనడం, అమ్మడం, కొనిపించడం, అమ్మించడం లాంటి పనులు చాలా అరుదుగా చేస్తాడు. అతగాడి వ్యాపారం తొంభై పాళ్ళు ద్రవ్య మారకం అని చెప్పాలి.
ముందుగా బ్రహ్మానందం పుట్టుపూర్వోత్తరాలు చెప్పడం అవసరం. బ్రహ్మానందం చిన్నప్పుడు ప్రతి క్లాసూ కనీసం రెండేసి సార్లు చదివాడు. “అదేమిటిరా?” అని ఎవరన్నా అడిగితే, “మంచి పునాది” అనేవాడు. అతనిది చాలా తీక్షణమైన బుద్ధి అని క్లబ్బులో అందరూ అనేవాళ్ళు. పేకాటతో వాడి బుద్ధి దినదిన ప్రవర్థ మానంగా వికసించడం మొదలయ్యింది. క్లబ్బులో పేకముక్కలు పంచగానే వళ్ళు విరుచుకున్నట్టుగా నటిస్తూ వెనక్కి వంగి వంగి, అతి నైపుణ్యంగా పక్కవాడి ముక్కలు చూసేసేవాడు. “అదేమిటయ్యా బ్రహ్మానందం?” అని ఎవడన్నా నిలదీస్తే, “అయ్యా! మన పేకముక్కలు మనం ఎప్పుడన్నా చూసుకోవచ్చు. పక్కవాడి చేతి జాతకం తెలిస్తే నెగ్గటం తేలికవుతుంది. ఇదే బ్రహ్మ సూత్రం” అనేవాడు. తన చిప్స్‌ జేబులో పెట్టుకొని, టేబుల్‌ మీద మిగితా అందరి చిప్స్‌ లెక్కపెట్టేసే వాడు. పక్క వాడి ఆర్థిక స్థితిమీద బ్రహ్మానందానికి ఎనలేని మమకారం.
బ్రహ్మానందం నాన్నగారు హైదరాబాదులో ఒక ప్రైవేటు బ్యాంకు జనరల్‌ మేనేజరుగా పనిచేసి రిటైర్‌ అయ్యాడు. ఆయన బావమరిది, అంటే బ్రహ్మానందం మేనమామ ఇన్‌కమ్‌ టాక్స్‌ ఆఫీసర్‌గా చాలాకాలం పనిచేసి, డెప్యూటీ కమీషనర్‌ గా రిటైర్‌ అయ్యాడు. వీళ్ళ ఇద్దరికీ పరిచయం లేని రాజకీయ నాయకుడు లేడు. ఎమ్మెల్లేలు, మాజీ మంత్రులు, తాజాగా ఎన్నికైన ఎంపీలు, ఒకడేమిటి, అందరూ వీళ్ళకి దోస్తులే! వీళ్ళిద్దరికీ తెలియని పోలీసు ఆఫీసర్లు, జడ్జీలూ లేరు. వీళ్ళ ఇళ్ళకి అన్ని పార్టీల నాయకులూ ఎప్పుడూ వచ్చీ పోతూ ఉండేవాళ్ళు. వీళ్ళ ఇళ్ళల్లో ఎప్పుడూ, ఏవో సంబరాలు, సంతర్పణలూ! అప్పట్లో, అంటే సుమారు ముప్ఫై యేళ్ళక్రితం మాట! వీళ్ళిద్దరి ఇళ్ళల్లోనూ సోడాలు పట్టే మిషనులు కూడా ఉండేవి. క్లబ్బులో అందరూ అంటూ ఉండేవాళ్ళు ‘ బ్రహ్మానందం ఒకచేత్తో వెండి చెంచా, మరోచేత్తో పేకముక్కా పట్టుకొని పుట్టాడర్రా’ అని. కాలేజీలో చదివే రోజుల్లోనే, బ్రహ్మానందం జేబులోఎప్పుడూ ఇరవై రూపాయిల నోట్ల కట్టలు ఉండేవి.
బ్రహ్మానందం నాన్నగారు బ్యాంకు మేనేజరు కాకముందు, తెలుగు దేశంలో ఎవరో గిట్టని తెలుగు వాళ్ళు ఆయన మీద ఏవేవో అభాండాలు వేసి,మూడేళ్ళపాటు ఆయన్ని ఉద్యోగంనుంచి సస్పెండ్‌ చేయించారు. బ్యాంక్‌ పైన కోర్ట్‌ కేసు పెట్టి, బ్యాంక్‌ వాళ్ళని హైకోర్ట్‌ దాకా ఈడ్చుకెళ్ళి ఆయన తన ఉద్యోగం తిరిగి సంపాదించుకున్నాడు ప్రొమోషన్‌తో సహా! అప్పుడే ఆయన బావమరిది పదిమందితో మాట్లాడి బాగా సహాయం చేసాడని అంటారు. ఆపైన తన కూతురు అనసూయ నిచ్చి బ్రహ్మానందానికి పెళ్ళి కూడా చేసాడు. బ్రహ్మానందం బి.ఎ. పాస్‌ అని విన్న మరుక్షణమే ఎం.బి.ఎ. చదువుకి, అమెరికా పంపించాడు తన స్వంతఖర్చుతో!
రెండేళ్ళల్లో మూడు యూనివర్సిటీలు మారి, చివరికి ఫ్లారిడా కోస్టల్ యూనివర్సిటీలో రిజిష్టరయ్యి, డిగ్రీ సంపాదించాడు, బ్రహ్మానందం. వెంటనే జె. జె. దోషీ అండ్ కంపెనీలో అసిస్టెంట్ బ్రోకర్‌ ఉద్యోగం సంపాదించాడు. జె.జె. దోషీ అండ్ కంపెనీకి బొంబాయి లోను, సూరత్ లోనూ బ్రాంచీలున్నాయి. ద్రవ్యమారక వ్యాపారంలో అతి సూక్ష్మమైన కిటుకులన్నీ స్వయంగా దోషీ గారి శిష్యరికం చేసి నేర్చుకున్నాడు. దోషిగారి వ్యాపారం నూటికి తొంభైతొమ్మిది పాళ్ళు నగదు వ్యాపారం. ఆయన అనేవాడు “వ్యాపారంలో ఒకడి మీద మరొకడికి నమ్మకం ఉండాలి. రాతకోతలు, రసీదులు ఇవ్వడం పుచ్చుకోవడం నాకు పనికిరాదు. అది నా వ్యాపార సరళి కానేకాదు. నా జీవితంలో నేను ఒక్కడికి కూడా రసీదు ఇవ్వలేదు; ఒక్కడి దగ్గిర నుంచి కూడా రసీదు పుచ్చుకోలేదు”.
బ్రహ్మానందానికి నగదు వ్యాపారం ఏమీ కొత్త కాదు. క్లబ్బులో పేకాట అంతా నగదు వ్యాపారవే కద! ఇండియా వచ్చినప్పుడల్లా, దోషీగారి పర్మిషన్‌తో బొంబాయి బ్రాంచికి, సూరత్ బ్రాంచికీ వెళ్ళి వాళ్ళు చేస్తున్న ద్రవ్యమారకం వ్యవహారం స్వయంగా చూసి వచ్చాడు. దోషీ గారికి బ్రహ్మానందం మీద మంచి గురి కుదిరింది. నమ్మకం పెరిగింది. బ్రహ్మానందం దోషీగారికి కుడిచెయ్యిగా తయారయ్యాడు, పనిలో చేరిన కొద్దిరోజుల్లోనే! పోతే, బ్రహ్మానందం నాన్నగారికి, మావయ్యగారికీ హైదరాబాదులో ఉన్న ప్రతిష్ట, పలుకుబడి వివరాలన్నీ వాకబ్‌ చేసి తెలుసుకున్న దోషీ గారు, ఒక సుముహూర్తాన, బ్రహ్మానందాన్ని తన ప్రెవేటు ఆఫీసు గదిలోకి పిలిచి, “చూడు బ్రహ్మా! హైదరాబాదులో జె.జె.దోషీ కంపెనీ బ్రాంచీ పెడదామని ఉంది. ఏమంటావ్‌?” అని అడిగాడు.
తడుముకోకండా చెప్పాడు, బ్రహ్మానందం. “హైదరాబాద్‌ లో బ్రాంచీ పెట్టడం కన్నా మంచి ఉపాయం చెబుతా, వినండి. నేనే అమెరికాలో ఒక బ్రోకరేజ్‌ కంపెనీ పెట్టి హైదరాబాదు నుంచి రాబోయే వ్యాపారం అంతా బొంబాయి, సూరత్‌లో బ్రాంచీల ద్వారా చేయడం సులభం, లాభదాయకం,” అని దోషీగారితో అన్నాడు. “ఇది ఏ రకంగా మనకి లాభదాయకం?” అని దోషీగారు అడగ్గానే, “ఒక కంపెనీ బదులు రెండు వేరే కంపెనీ లయితే మనకి అమెరికాలో ఆదాయపు పన్నుల భారం సగానికి సగం తగ్గుతుంది, పేరుకి రెండు కంపెనీలు గానీ, వెనకమాటుగా జరిపే అసలు వ్యవహారం అంతా ఒక కంపెనీ ద్వారానే కదా! ” అని ఠకీమని దోషీగారికి సమాధానం చెప్పాడు. ఇదేదో దోషీగారికి తెలియని బ్రహ్మ విషయం కాదు; బ్రహ్మానందం తెలివికి, వ్యాపార వ్యవహారాలలో లౌక్యతకి షహబాష్‌ అని మెచ్చుకున్నారు. అంతే! పదిహేనేళ్ళ క్రితం, దీపావళి రోజున ఎ.బి. బ్రోకర్స్‌, ఎల్‌ఎల్‌సీ, ప్రారంభమయ్యింది.
హైదరాబాదు నల్ల రూపాయలని తెల్ల డాలర్లుగా మార్చడంతో మొదలైంది ఎ.బి. బ్రోకర్స్‌ వారి వ్యాపారం. అది బోణీ. అంతే! అప్పటినుంచీ నాన్నగారికి, మావయ్యగారికి ఉన్న పరిచయస్తులందరికీ, ఆ పరిచయస్తుల దోస్తులందరికీ వాళ్ళ చుట్టాలకీ పక్కాలకీ అమెరికాలో బినామీ ఎక్కౌంట్లు ప్రారంభించాడు. ఆ ఎక్కౌంట్లు జాగ్రత్తగా చూసిపెట్టినందుకు మస్తుగా కమీషనులు ముట్టుతున్నాయి! మొదటి పదేళ్ళూ ఈ వ్యాపారం బాగానే జరిగిపోయింది, మూడు పువ్వులూ, ఆరుకాయల్లా!
ఫమీదా బ్రహ్మానందం కంపెనీలో బ్రహ్మనందానికి పర్సనల్‌ అసిస్టెంట్ గా చేరింది. కొద్దిరోజుల్లోనే ఆ పరిచయం చాలా దగ్గిర స్నేహంగా మారింది. అలా దగ్గిర స్నేహంగా మారడానికి ఒకరకంగా అనసూయే కారణం అని చెప్పాలి. అనసూయా బ్రహ్మానందాల సంసారం పెళ్ళయిన మొదటి మూడేళ్ళూ ముచ్చటగానే సాగింది. ఆ తరువాత అనసూయ మనసు అమెరికాలో దేవాలయాల మీదికి మళ్ళింది. ఎప్పుడూ ఏవో పూజలు, పునస్కారాలూ! ఆషాఢమాసం మినహా, ప్రతినెలా ఏవో నోములూ, వ్రతాలూ చెయ్యడంలో పుణ్యకాలం కాస్తా పూర్తయ్యేది. దానికి తోడు ఎడతెరిపి లేకండా అమెరికా వచ్చీపోయే అమ్మలూ, బాబాలూ! అనసూయా బ్రహ్మానందాల జీవితంలో పెద్ద అగాథం గానీ కందకం గానీ పడిందని చెప్పలేం గానీ, ఒక చిన్న గండి పడిందనే చెప్పాలి. బ్రహ్మానందం ఒక్కొక్కసారి రెండు మూడు రోజులుపోయినా ఇంటికొచ్చేవాడు కాదు. ఇక వారాంతంలో అసలు కనిపించేవాడు కాదు. అనసూయ ఇదంతా పట్టించుకున్నట్టే ఉండేది కాదు. ఆవిడ లోకం ఆవిడదే!
ఫమీదా పరిచయంతో ఒక్క ఉదుటున బ్రహ్మానందం అదృష్టం మారిందనే చెప్పాలి. ఫమీదా పదిహేనేళ్ళక్రితం పాకిస్థాన్‌ లో హైదరాబాదు నుంచి అమెరికా వచ్చింది. బ్రహ్మానందం పాతికేళ్ళక్రితం మన హైదరాబాదునుంచి అమెరికా వచ్చాడుగదా! ఇది కేవలం కాకతాళీయమే! ఏదయితేనేం. ఇప్పుడు ఎ.బి.బ్రోకర్స్‌ ఫమీదా ధర్మవా అని, పాకిస్తాను నల్లరూపాయల మారకం గూడా మొదలు పెట్టారు. ఆ విషయాలు పూర్తిగా ఫమీదాయే చూసుకుంటుంది.
ఇప్పుడు, రెండు హైదరాబాదుల నల్ల రూపాయలనీ తెల్ల డాలర్లుగా మార్చడం సరి కొత్త పంథాలు తొక్కింది. దీనికి సూరత్‌లో దోషీగారి బ్రాంచ్‌ మంచి మద్దతే ఇచ్చింది. నల్ల రూపాయలతో ముందస్తుగా సూరత్‌లో వజ్రాలు, వజ్రాల హారాలూ కొనడం, అవి అమెరికా తెచ్చి అమ్మడం. నగదు బేరమైతే కాస్త తక్కువ ఖరీదుకి అమ్మి, ఆ డాలర్లు నగదుగా దాయడం! ఇది సరి కొత్త పంథా! ఇది చాలా సూటిగా ఇబ్బంది లేకండా జరిగే పని. పాకిస్తాను రూపాయలతో మేలిమి బంగారు నగలు కొని, అవి దుబాయ్ అమ్మాయిల ద్వారా అమెరికాకి ఇంగ్లాండుకీ రవాణా చెయ్యడం. ఇది కొంచెం అడ్డదారి. అయితేనేం, ఈ రోజుల్లో అమెరికాలో బంగారు నగలు కుడీ ఎడమా తేడా లేకండా కొనేసే భారతీయ జనాభా పదిరెట్లు పెరగడంతో, నగల వ్యాపారస్తుల సంఖ్య కూడా అల్లాగే పెరిగింది. ఈ నగల వ్యాపారం కూడా భారీ ఎత్తునే జరుగుతున్నది. వాళ్ళకి పాకిస్తానీ నగలు కాస్త చవగ్గా అమ్మి డాలర్లు, పౌండ్లూ, యూరోలు సంపాదించడం కొంచెం తిరకాసు వ్యవహారం అయినా కష్టమైన పని మాత్రం కాదు. ఈ వ్యాపారంలో కూడా ఫమీదా పాలే ఎక్కువ. ఒక్కొక్కసారి, బంగారు నగలు కరిగించి నవరసులుగా, నాణేలుగా మార్చి అమ్మడం! ఇది కాస్త కష్టమైన పనే! అందుకని, ఈ పని పూర్తిగా దోషీగారి అజమాయిషీలోనే జరగాలి. అసలు తమాషా ఏమిటంటే, ఈ నాణేలు, నవరసులూ మళ్ళీ హైదరాబాదులకే తిరిగి వెళ్ళి, నగలుగా మారి అమెరికా తిరిగి వచ్చేస్తాయి.
వచ్చిన మార్పల్లా ఎక్కడుందంటే, దోషీగారి కంపెనీ, బ్రహ్మానందం కంపెనీలలో పనిచేసే అందరూ, చప్రాసీలతో సహా కట్టల కట్టల డాలరు నోట్లు దాయాలి; జాగ్రత్తగాఎక్కౌంటులు రాసి ఉంచాలి. ఇప్పుడు బ్యాంకులతో పని తక్కువే, ఎప్పుడో నూటికీ కోటికీ తప్ప! అయితే సేఫ్ డిపాజిట్ బాక్సుల అవసరం బాగా పెరిగిపోయింది, అంతే. అక్కడి నల్లరూపాయల దాపకం లాగానే ఇక్కడ నల్లడాలర్లు దాయడం బాగా పెరిగింది.
ఈ మధ్య మధ్యనే ఈ వ్యాపారం కాస్త కష్టం అవడం మొదలయ్యింది. అమెరికాలో మనవాళ్ళ జనాభా బాగా పెరగడంతో, హైదరాబాదులో ఉన్న ప్రతినాయకుడికీ, ఆఫీసరుకీ చుట్టాలో పక్కాలో పెరగడంతో బ్రహ్మానందం, దోషీల వ్యాపారం కాస్త సన్నగిల్లింది. అంతే కాదు; ఈ మధ్యకాలంలో డాలర్‌ విలువ బాగా పడిపోవడంతో మస్తుగా నల్ల రూపాయలు సంపాదించి దాచుకున్న మొఖాసాదారులు వాళ్ళ నల్ల డబ్బు తెల్ల డాలర్లుగా మార్చడానికి కాస్త తటపటాయించడం మొదలెట్టారు. బ్రహ్మానందం కంపెనీకి కమీషనులు తగ్గాయి. పైగా ప్రతిసారీ దోషీగారితో కమీషను పంచుకోవడంతో తన పాలు లాభం అయిదు శాతానికి పడిపోయింది.
ఈ వారం రూపాయి పరంగా డాలరు విలువ కొంచెం వేగంగా ఎక్కువగా పడిపోవటం మొదలయ్యింది. శుక్రవారం మధ్యాన్నం వచ్చేసరికి డాలరుకి ముప్ఫై ఏడు రూపాయలే ఇస్తున్నారు! ఒకప్పుడు, డాలరుకి యాభై రూపాయలిచ్చేవాళ్ళు గదా! అప్పట్లో డాలర్లు కొనుక్కున్న వాళ్ళకి కొంచెం కంగారు పుట్టింది. రోజంతా బ్రహ్మానందం కంపెనీకి హైదరాబాదులనుంచి టెలిఫోను మీద టెలిఫోను పిలుపులే! ఎక్కడా ఊపిరి సలపనియ్యకండా పిలవడం మొదలెట్టారు జనం అంతా! వాళ్ళని సముదాయించలేక ఫమీదా, బ్రహ్మానందం, ఇద్దరూ నానా యాతనా పడ్డారు. అక్కడ దోషీగారి ఆఫీసులోనూ అంతే! మార్కెట్ ముగిసేటప్పటికీ డాలరు ముప్ఫై ఐదు రూపాయలకి పడింది. దగ్గిర దగ్గిర ముప్ఫై శాతం నష్టం వచ్చేసింది, ఒక్కవారంలో! “ఈ రకంగా డాలరు పడిపోతే మన కంపెనీలు పొలో మని దివాలా తీసేస్తాయి” అని అన్నది ఫమీదా సాయంత్రం ఆఫీసులో దీపాలార్పుతూ ! కాస్త భయం వేసినా, బ్రహ్మానందం పైకి ధీమాగా “ఎబ్బే! అల్లాంటిది ఏమీ జరగదు. ఇదంతా టెంపరరీ! ఏ గవర్నమెంటూ ఏ కరెన్సీ అలా పడనీయదు” అని ధైర్యం చెప్పాడు.
ఇద్దరూ, ఆనవాయితీగా బారులో చేరారు. బ్రహ్మానందం ప్రభుత్వాలు కరెన్సీలని ఎలా కాపాడతాయో చెప్పడం మొదలెట్టాడు, యధావిధిగా మూడు షాట్ల టకీలాలు పట్టించి. ఫమీదా ఊ కొడుతూన్నదే కాని, ఇవాళ తన ధ్యాస అంతా టెలిఫోను పిలుపుల కిచ్చిన సమాధానాల మీదే! రకరకాల వాళ్ళకి రకరకాల సమాధానాలు ఇచ్చింది. బ్రహ్మానందమూ ఏవేవో సమాధానాలు ఇచ్చాడు!
ఇవాళ పొద్దున్న మార్కెట్ ప్రారంభమయ్యేటప్పడికీ, నానా గందరగోళంగా ఉంది. డాలరు విలువ అమాంతం ఇరవై రెండు రూపాయలకి పడిపోయింది. నిన్న ఇండియాలోనూ పాకిస్తాన్‌ లోనూ మార్కెట్ బంద్‌, అని టెలివిజన్‌ లో బాకా ఊదినట్టు ఎనలిస్టులు ఒకటే వాగుతున్నారు. కరాచీలోలోనూ, ముంబయిలోనూ బ్రోకర్లు ఆత్మహత్యలు చేసుకున్నట్టు సి.యన్‌.బి. సీ లో క్రింద రన్నింగ్‌ బేనర్!
బ్రహ్మానందం, దోషీ గార్ల ఆఫీసు టెలిఫోన్లకి తెరపి లేదు. ఎవడూ టెలిఫోను ఎత్తడం లేదు. ఏమని చెప్పగలరు గనక? ట్రాన్స్ అమెరికా ఆఫీసు చుట్తూ కూడా మనవాళ్ళు తంబలు తంబలుగా పోగవడం మొదలయ్యింది. మఫ్తీ లో ఉన్న పోలీసులు గేటు దగ్గిర కాపలా కాస్తున్నట్టు కనిపించింది. కొంపదీసి, ఎఫ్. బి. ఐ. వాళ్ళూ కాదు కదా! ఈ నగదు వ్యాపారం, నగల వ్యాపారం ఎప్పుడో మన కొంప తీస్తుందేమో అని ఫమీదా ఎప్పుడూ భయం భయంగా అంటూ ఉండేది. ఐ. ఆర్. యస్. వాళ్ళు కాదు కదా!
“ఒరేయ్‌ బ్రహ్మానందం! ఏమిటిరా ఇదంతా! మన ఇంటి చుట్టూ నాన్న గారి పాత స్నేహితులంతా నిఘా వేయించారు. దున్నపోతుల్లా బలిసిన వాళ్ళు లాఠీలు పట్టుకొని అటు ఇటూ తిరుగుతున్నారు. మావయ్య ఇల్లు కిక్కిరిసి పోయింది. ఎడ తెరపి లేకండా వచ్చీ పోయే జనం. వెంటనే ఇంటికి పిలువు నాయనా! మీ ఇంటికి పిలిస్తే ఎవ్వరూ టెలిఫోను ఎత్తటం లేదు. నాకు ఏదో భయంగా ఉంది,” అని అమ్మ కంగారు పడిపోయి గగ్గోలు పెట్టేస్తోంది, ఐదేసి నిమిషాలకోసారి, ఆఫీసుకి ఫోన్ చేస్తూ. ఒకట్రెండు సార్లు ధైర్యం చెప్పి తర్వాత ఫోనెత్తటం మానేశాడు. ఫమీదా కిటికీలోంచి బయటికి చూసి, “క్యా కరూఁ” అన్న ట్టు మొహంపెట్టి చూరు కేసి చూడటం మొదలెట్టింది, గోళ్ళుగిల్లుకుంటూ! బ్రహ్మానందం కొంచెం నలతగా అనిపిస్తుంటే టై ఊడదీసి కళ్ళు మూసుకొని కుర్చీలోనే జారగిలబడ్డాడు.
“…ఫమీదా! ఫమీదా! నీ దగ్గిరున్న వజ్రాలు గొలుసులూ పట్టుకోరా. మనిద్దరం ఏదో ఓ దారి చూసుకొని దుబాయ్ వెళ్ళిపోదాం. అక్కడ మా నాన్ననీ మావయ్యనీ, గూండాలు గుటుక్కుమంటారు! పాపం అనసూయ గతేం అవుతుందో… అమ్మా, అత్తయ్యలు అడుక్కు తినాల్సి వస్తూందేమో. ఎలా దేవుడా…”
“….అనసూయా, అమ్మా, అత్తయ్యా, ఫమీదా, ఫమీదా…” అంటూ గట్టిగా అరుపులు వినిపిస్తే ఫమీదా పరిగెత్తుకొచ్చింది, “బ్రమ్మీ, బ్రమ్మీ” అంటూ.
ఒళ్ళంతా చెమటతో తడిసిపోయి, గజగజ వణికిపోతూ కుర్చీలో నిటారుగా కూర్చొని ఉన్నాడు, బ్రహ్మానందం, కళ్ళు నులుముకుంటూ. మంగళవారం మిట్టమధ్యాన్నం!
నోట్‌ : నిరుడు అక్టోబర్‌లో, రూపాయి విలువ పన్నెండు శాతం పెరగంగానే “అక్కడ ఇండియాలో మా నాన్న అమ్మా అడుక్కొతినే స్థితి వస్తుంది, ఇలా రూపాయ విలువ పెరగడం మొదలెడితే! డాలర్‌ కి యాభై రూపాయలు పైచిలుకు దొరకడం న్యాయం, ధర్మం” అనే అర్థం వచ్చేట్టు రాసిన ఒక భారతీయ బ్లాగరు బ్లాగు చదివింతరువాత!