1.
లయలో బంధిస్తేనే
పదాలకి రెక్కలు
నీలో బంధిస్తేనే
నా మనసుకు!
2.
చెట్టుకి రెక్కల్లేవు
అందుకేనేమో
పక్షుల్ని పెంచుకుంటుంది
3.
శ్రావణ మేఘం
శుభ్రంగా కడిగీసింది
బుద్ధుడి భుజం మీద
పక్షి వేసిన రెట్టని!
4.
ఆకాశ లింగాన్ని అభిషేకిస్తున్నట్టు
ఖాళీ పాత్రలోకి పితుకుతున్న పాలు
జల లింగాన్ని అభిషేకిస్తున్నట్టు
నేల నూతిలో కురుస్తున్న వాన
5.
నేనొక
మజ్జిగ చుక్కని
నన్ను తాకిన
ప్రతి పాలచుక్కనీ
నాలా మారుస్తాను!
6.
వెన్నెల కన్నీటిని తుడుస్తూ సూర్యుడు
సూర్యుడి కోపాన్ని చల్లారుస్తూ వెన్నెల
భార్యాభర్తలు!
7.
చూస్తుండగానే..
సీతాకోక ఎగురుకుంటూ
కట్లపాము పాక్కుంటూ
కప్ప గెంతుకుంటూ
రోడ్డు దాటేసాయి!
8.
కరిగిపోయే కాలంలోని
సౌందర్యం
ఆమె వేళ్ళ సందుల్లోంచి
నదిలోకి జారే నీటిముత్యాలు!