ఎంతబాగుంది
ఎవరినీ పట్టించుకోని ఈ
సంతోషపు పిట్ట

ఉన్నట్టుండి
గోడమీంచి వూగని వూయల పైకి
దాని మీంచి వూగే చిటారు కొమ్మపైకి ఎగిరింది
పిడికెడంత బరువుకే
కిందాకా తూగిన కొమ్మచివరన
చిన్ని పిట్ట పైకీ కిందకీ సంతోషాన తేలింది
తననెవరు చూస్తున్నా లెక్కలేకుండా
తోక ఈకలను పైకెత్తి
కూసి కూసి ఎగిరింది

ఎన్ని భావాలకు రంగులను అద్దితేనో కదా
ఒక మెత్తటి ఈకవుతుంది
ఎన్ని రంగుల ఈకలను పొదువుకుంటేనో కదా
ఇలాటి ఒక పిట్టవుతుంది

నేను వచ్చి ఇక్కడ కూచుందే
అందుకు కదా
అటుగా ఎగిరి వెళ్ళే
ఇలాటి రంగు రెక్కల ముద్దుపిట్టొకటి
వాలి పలకరిస్తుందనే కదా

ఇలాటి రంగులపిట్టల
కువకువలెన్నో జతపడితే కదా
ఒక కవిత చేరి వాలుతుంది
నేనిక్కడికి వచ్చి కూచుందే అందుకు కదా

రంగుల ఈకలను పొదువుకుని
లోలోపలగా ఎగిరే చిన్ని వూహల పిట్టలు
గుండె చిటారు కొమ్మన వాలి కిందాకా వూగి
పైకెగిరి పలకరిస్తాయనే కదా!