ఎండిన కొమ్మల్ని కాస్త కత్తిరించి
కాసిన్ని నీళ్ళు మొదల్లో చిలకరించి
అడ్డగోలుగా చాచే చేతుల్ని ఒద్దికగా
ఒక దగ్గరకు చేర్చడం తప్ప
అసలేం చేశానని?!
నీ పచ్చని నవ్వుల నాట్యం
మొగ్గలు తొడిగే కొమ్మ చివర్లు
ప్రసరించే రంగుల మేళవింపు
నేల గుండెపై పసిపాదాల తప్పటడుగులను
గుర్తు చేస్తే, మళ్ళీ అదే ప్రశ్న-
అసలేం చేశానని?!
ఇదిగో ఇక్కడే నీ మొదళ్ళున్నాయని
కాసిన్ని నీళ్ళు చల్లి పలకరిస్తే
ఏమీ పట్టనట్లు, పట్టించుకోనట్లు,
ఆకాశాన్నంటాలని ఆదుర్దాగా ఎదుగుతూ,
ఇంక నీతో పనేముందన్నట్లు తలెగరేశావే-
అసలు నేనేం చేశానని?!