వంటరితనం మిత్రమా వంటరితనం
అడుగు పెట్టకుండానే ఆలింగనం
జ్ఞాపకాల మాయలో స్ఖలనస్వప్నం
సాధ్యాసాధ్యాల సౌధాల శకలం
సమూహాల సమ్మర్దంలో
చిక్కబడుతున్న వంటరితనం

సహజీవనం మిత్రమా సహజీవనం
కంటికీ రెప్పకీ మధ్య
నెరవేరని కాంక్షలతో సహజీవనం
కన్నీరుతో చిరునవ్వుతో సహజీవనం
పట్టువిడుపులు తెలియని స్వార్ధపు బిగింపులతో
జనం మెచ్చిన చట్రాలతో సహజీవనం

వత్తిళ్ళు మిత్రమా వత్తిళ్ళు
మానవత్వపు వత్తిళ్ళు
మనిషి తత్వపు వత్తిళ్ళు
అత్తిపత్తి అమాయకత్వాన్ని
తుత్తునియలు చేసే వత్తిళ్ళు
పనితో వత్తిళ్ళు పనిలేక వత్తిళ్ళు

వేదనలు మిత్రమా వేదనలు
లాలసల నీడలో సున్నితత్వపు రోదనలు
మురిగిన మురిపెపు వేదనలు
జననానికి వేడుకతో
మరణానికి మౌనంతో వేదనలు

ఇన్ని వర్ణాల, కిరణాల, చర్వితచర్వణాల
జీవితపు జాతరలో
మనసొక పెద్ద మందు పాతర