నిశ్శబ్దం నీకూ నాకూ మధ్య
అసహనం నీ అరచేతిలో రిమోట్లా ఒదిగి
ఆలోచనల ఛానెళ్ళను అస్తవ్యస్తంగా మారుస్తుంది
పరధ్యానం నా పుస్తకంలో తల దాచుకుని
అన్యమనస్కంగా పేజీలు తిరగేస్తుంది
లివింగ్ రూం సోఫాలో టివి ముందు నువ్వు
లైబ్రరీలో మెడికల్ జర్నల్తో నేను
భరించలేని ఈ నిశ్శబ్దపు అగాధాన్ని
బింకంగా దాటే ఉపాయం కోసం
ఎవరికి వారే వెతుక్కుంటూ ఉంటాము
ఏ చిన్ని కలహమైతే మన మధ్య కోటగోడలా నిల్చి
మన మాటలు మనకే వినబడకుండా చేసిందో
ఆ కోటగోడని నీకూ నాకూ మధ్య నిశ్శబ్దం
నెమ్మది నెమ్మదిగా కరిగించి వేస్తుంది
ఎప్పటి లాగా ఈ రోజు చిరునవ్వుల విరజాజులు
నులివెచ్చని పరామర్శలు మనల్ని స్పర్శించక పోయినా
సంక్షిప్తమైన మన చూపుల్ని కలుపుతూ
ఏటవాలుగా విరియటానికి ఓ ఇంద్రధనుస్సు
ఆరాటపడుతూనే ఉంటుంది
నేను చెప్పాలనుకున్నవన్నీ నీకూ
నీవు చెప్పలేనివన్నీ నాకు
గుసగుసగా వినిపించేసి
నీకూ నాకూ మధ్య నిశ్శబ్దం
మూగబోయిన వాయిద్యమై మెరుస్తుంది
అంచెలంచెలుగా సాగిన జుగల్బందీలో
రసాత్మకమైన రాగాన్ని ఆలపించి
విశ్రాంతి తీసుకుంటున్న సహ గాయకుల్లా
కరిగిన గోడల మధ్య చెదిరిన మేఘాల క్రింద
మనిద్దరం మౌనంగా మిగిలిపోతాము
ఎందుకో ఒక్కోసారి
నీతో మాట్లాడకపోయినా
మాట్లాడుతున్నట్లే ఉంటుంది
(యండమూరికి కృతజ్ఞతలతో)
రచయిత వైదేహి శశిధర్ గురించి: జన్మస్థలం గుంటూరు జిల్లా నరసరావుపేట. నివాసం న్యూ జెర్సీలో. వైద్యరంగంలో పనిచేస్తున్నారు. చాలా కవితలు ప్రచురించారు. ... పూర్తిగా »
ravikiran timmireddy అభిప్రాయం:
March 1, 2008 6:48 pm
బావుందండి. మాట్లాడే నిశ్శబ్దాన్ని చాలా చక్కగా తెనిగించారు.
malathi అభిప్రాయం:
March 2, 2008 4:12 am
నీకూ నాకూ మధ్య నిశ్శబ్దం
మూగబోయిన వాద్యమై మెరుస్తుంది
— రసాత్మకంగా వుందండీ. మౌనంగురించి నాకున్నంత అనుభవం మరెవరికు వుండదేమో అనిపిస్తుంది ఒకోసారి. చక్కగా చెప్పారు.
అభినందనలు.
నిషిగంధ అభిప్రాయం:
March 3, 2008 4:42 am
‘ఎందుకో ఒక్కోసారి
నీతో మాట్లాడకపోయినా
మాట్లాడుతున్నట్లే ఉంటుంది’
అరె! నా మనసులో మాట మీకెలా వినిపించిందా అనుకున్నాను!! ఎన్నిసార్లు చదివానో తెలీదు.. చాలా బావుంది..
యండమూరి పుస్తకాల్లో నాకు బాగా నచ్చినవాటిల్లో ఇదొకటి.. :)
radhika అభిప్రాయం:
March 3, 2008 1:43 pm
చాలా బాగుందండి.ఇదే కాన్సెప్ట్ తో నా భావాలు పేపరు మీదున్నాయి.మీవి మాత్రం అప్పుడే మా మనసుల్లో చేరిపోయాయి.
rama అభిప్రాయం:
March 4, 2008 5:18 am
డియర్ వైదేహి,
చక్కటి భావానలున్నాయి మీలో. బాగా వ్యక్తం చెయ్యగలిగారు. congrats. “సంక్షిప్తమైన మన చూపుల్ని కలుపుతూ ఏటవాలుగా విరియటానికి ఓ ఇంద్రధనుస్సు ఆరాటపడుతూనే ఉంటుంది” భలే గా వుంది ఊహ. అలాగే “నిశ్శబ్దం మూగబోయిన వాయిద్యం” అనటం కూడా. మంచి ఇమేజెస్, original గా ఉన్నాయి. మరిన్ని మంచి కవితలని మీనించి ఆశిస్తూ…
rama
Sowmya అభిప్రాయం:
March 6, 2008 1:04 am
ఇక్కడ నాకు యండమూరి కాన్సెప్ట్ ఏమిటో అర్థం కాలేదు కానీ,
ఈ కవిత మాత్రం చాలా నచ్చింది !
Vaidehi Sasidhar అభిప్రాయం:
March 6, 2008 6:34 am
ముందుగా నా కవిత పై అభిప్రాయం తెలిపిన రవికిరణ్,మాలతి,నిషిగంధ,రాధిక,రమ,సౌమ్య గార్లకు ధన్య వాదాలు.
సౌమ్య గారూ, యండమూరి మరీ పాప్యులర్ (కొంతమంది కమర్షియల్ అని కూడా అంటారు) రచయిత కాకముందు వ్రాసిన చిన్న నవలలలో ఓ నవల పేరు “నిశ్శబ్దం నీకూ నాకూ మధ్య”.
ఆల్రెడీ ఆయన Coin చేసిన Phrase ను నా కవిత టైటిల్ గా పెట్టటం జరిగింది కాబట్టి కృతజ్ఞతలు తెలిపాను.
It is nothing but a polite acknowledgement.
అంతకు మించి ఈ కవితతో,ఆ నవలకి,యండమూరి కి ఏమీ సంబంధం లేదు.
Sorry for the confusion.
Regards
Vaidehi
Kallakuri Lakshmi అభిప్రాయం:
April 8, 2008 9:33 am
వైదేహి,
నిశ్శ బ్దాన్ని శ బ్ద రూపములో చెప్పటము మీకే చెల్లింది. మనసుల మౌనాన్ని,
అలజడులను గుసగుసలుగ మూగ వోయిన వాయిద్యము మౌనరాగాన్ని మెరిపించటము(ఆలాపించటము) ఎంతో రసరంజనముగా నున్నది.
గుండెల్లో దాగిన ప్రేమ సాగర(రి)కు గుండెల్లో దాగిన నిశ్శబ్దమే(మౌనమే) శబ్దము. -చివరి మూడులైనులు.
ఏటవాలుగా విరిసే ఇంద్రధనస్సు -తుషార కన్నీటి భావ బిందువా?
ఎలా చెప్పాలో(శబ్దపరచాలో) తెలియదే నాకు నా అనుభూతుల నిశ్శబ్దము!
‘సాయిలక్ష్మి’
padmaja అభిప్రాయం:
April 15, 2008 8:39 am
ఎంత చక్కగా వ్రాశారు. ఎవరికి వారికి ఇది తమ గురించే అనిపిస్తుందేమో!
సాదాగానే మొదలయిందనుకున్నాను. కలహపు కోట గోడను నిశ్శబ్దం కరిగించడం చదువుతూనే చిన్న అలజడి. సుపరిచితమైనా, వ్యక్తం చేయలే(రా)ని భావనలను అందంగా ఆవిష్కరించారు. లక్ష్మి గారు వ్రాసిన “తుషార కన్నీటి భావ బిందువు” చాలా బావుంది.
Vaidehi Sasidhar అభిప్రాయం:
May 2, 2008 6:52 am
నా కవితపై తమ అభిప్రాయం తెలిపిన సాయిలక్ష్మి,పద్మజ గార్లకు ధన్యవాదాలు.
లక్ష్మి గారూ,
“ఏటవాలుగా విరిసిన ఇంద్రధనుస్సు ” తుషార కన్నీటి భావ బిందువా అన్న మీ ప్రశ్నచాలా అందమైన స్పందన.ఆ భావన తాలూకు క్రెడిట్ పూర్తిగా మీదే.
“ఒక కవిత కవికి “ఒక్క” కవితే కానీ అది పాఠకులకు అనేక కవితలుగా ఆవిష్కరింప బడుతుంది “,అంటూ ఉండేవారు మా నాన్న గారు.
ఇది కవిత్వానికి ఉన్న universality కి,రసజ్ఞులైన పాఠకుల స్పందనా శక్తికి సంబంధించిన విషయమేమో అనిపిస్తుంది. ఒక కవితలో ఉన్న నిర్దేశిత భావాన్ని అంటిపెట్టుకుని ఉండటానికి ఆస్కారం ఉన్న అనేక
సంబంధిత భావనల్ని పాఠకులు చూడగలుగుతారు.
ఒక సాధారణ అనుభవం,కవి వైయుక్తిక అనుభూతిగా కవిత్వీకరణ చెందినపుడు,అదే అనుభవం పాఠకుల వైయుక్తిక అనుభూతిలోకి ఒక కొత్త కోణం లో transfer అవటం కారణం కావచ్చు కూడా.
అభిప్రాయాలు తెలిపి ప్రోత్సహించిన పాఠకులందరికీ కృతజ్ఞతలు.
వైదేహి శశిధర్.