1.
పక్షుల కిలకిలారావాలతో
మొదలవ్వాల్సిన కొన్ని ఉదయాలు
తుపాకీ మోతలతో మొదలవటం
ఎంత విషాదం!2.
చికన్ షాపు గంపలోంచి
కోడిపుంజు మెడ సారించి
కొక్కొరొక్కో అంటూ కూస్తోంది
గడియలు సూచిస్తూ3.
బయట ఆగిపోయిన వాన
లోపల ఇంకా కురుస్తూనే ఉంది
కాలం నిండా తూనీగల గుంపు4.
ఏమీ ఆశించకుండా కృతజ్ఞత
ఉదారంగా కరుణ చూపే వ్యక్తి కోసం
ఆమె ఇంకా ఎదురుచూస్తూనే ఉంది
హృదయం ఒక బార్ కోడెడ్ వస్తువు
అయిపోయిందన్న విషయం
ఆమెకెవరైనా చెపితే బాగుణ్ణు5.
సరైన పదం కోసం
చీకట్లో తడుముకొంటూంటే
చేతికి సూర్యుని ముక్క తగిలింది
ఉదయం పద్యమై
విచ్చుకొంది
రచయిత బొల్లోజు బాబా గురించి:
బొల్లోజు బాబా ఆధునిక తెలుగు సాహిత్యంలో కవి, అనువాదకుడు, చరిత్ర రచయితగా తనదైన ముద్ర వేసిన రచయిత. కవిత్వంలో మానవీయ స్పందన, సామాజిక చైతన్యం, ప్రకృతి పట్ల సున్నితమైన దృష్టి ఆయన ప్రత్యేకత. ఆకుపచ్చని తడిగీతం, వెలుతురు తెర, మూడో కన్నీటి చుక్క వంటి కవితా సంపుటులతో పాటు, ప్రపంచ కవిత్వాన్ని తెలుగులోకి అనువదించారు. స్వేచ్ఛా విహంగాలు, థేరీ గాథలు, ప్రాచీన గాథలు ఆయన అనువాద ప్రతిభకు నిదర్శనాలు. కవిత్వ భాష వంటి సాహిత్య వ్యాస రచనలు ఆయన విమర్శనాత్మక దృష్టిని ప్రతిబింబిస్తాయి. చరిత్ర, సంస్కృతి, సామాజిక పరిణామాలపై కూడా విస్తృతంగా రచించిన ఆయన సాహిత్య కృషికి పలు పురస్కారాలు లభించాయి.
... పూర్తిగా »